Microsoft ChatGPT билан кучайтирилган Bing қидирув тизимининг янги версиясини тақдим қилди!
Кутилганидек, Microsoft ўзининг Bing қидирув тизимининг ChatGPT сунъий интеллекти технологиясига асосланган янги версиясини расман тақдим қилди. Компания, шунингдек, бир қанча янги СИ функциялари билан янгилаган Edge браузерини ҳам кўрсатди. Microsoft улар биргаликда Интернетдан маълумотлар қидириш ва топишнинг янгича тажрибасини таклиф қилишини таъкидламоқда.
Microsoft'нинг Редмонддаги бош қароргоҳида ўтказилган ёпиқ тақдимотда компания ўзининг "янги Bing" қидирув тизимининг сунъий интеллект ёрдамида қандай ишлашини турли хил конфигурацияларда кўрсатди. Агар янги Bing орқали бирон нима қидирадиган бўлсангиз, сиз сўровингизга оид жавобларни икки хил кўринишда оласиз: чап томонда анъанавий, яъни тегишли манба ва сайтлар учун ҳаволалар рўйхати, ўнг томонда эса сунъий интеллект технологиясига асосланган ҳолда яратилган матн. Ўнг томондаги жавобларнинг барчаси юқори/паст бош бармоқли лайк/дислайк тугмалари, ҳамда, нусха олиш тугмаси билан кўрсатилади. Манбаларни ўз ичига олган устун белгилари эса матн орасида, гаплар охирида кўриниб туради.
Янги Bing, шунингдек, Chat режимига ҳам эга. Худди мессенжерлар интерфейсига ўхшаш UI'га эга бўлган саҳифада сиз Bing'дан ўзингизни қизиқтирган саволларни сўрашингиз мумкин. "буни оддийроқ қилиб тушунтира оласанми?" ёки "менга кўпроқ танловлар бер" саволлари сўрашингиз ва суҳбат бошлашингиз мумкин. Айтиш керакки, бу хусусият ҳозирча омма учун ёпиқ.
Қўшимчасига, янги Bing'нинг қидирув қутиси 1000 тагача белгиларни қўллаб-қувватлайди. Шундай экан сиз билмоқчи бўлган нарсангизни етарлича сўзлар билан қидириш учун катта имкониятга эга бўласиз. ChatGPT'дан фарқли ўлароқ, янги Bing сўнгги воқеаларга асосланган маълумотларни ҳам бера олади.
Маълум бўлишича, Bing қувватланган сунъий интеллект технологияси ҳатто ChatGPT'дан ҳам кучлироқ бўлиб, у OpenAI'нинг қидирув учун махсус мослаштирилган янги авлод LLM технологияси ҳисобланади ва унинг номи ҳозирча номаълум.
Microsoft, шунингдек, ушбу "янги Bing"ни ўзининг Edge браузерига ҳам интеграциялаштирмоқда. Бунда сиз ундан браузернинг ўнг томонидаги янги Bing ён панели орқали фойдаланишингиз мумкин бўлади.
Янги Bing ҳозирда чекланган сўровлар сони билан синаб кўриш учун оммавий очиқ бўлиб, ундан сиз компютерингизда фойдаланиб кўришингиз мумкин. Компания яқин келажакда уни мобил қурилмалар учун ҳам чиқаришни режалаштирган. Тизимга тўлиқ кириш учун кутиш рўйхатига ёзилиши керак.
