Ретро: Nokia 3310 – “ўлмас телефон”
Nokia 1999 йилда GSM тармоғида ишлайдиган, SMS функциясига эга ва машҳур “Snake” ўйини ўрнатилган Nokia 3210 моделини яратади. Ушбу модель компания кенг миқёсли сотувга чиқарган илк телефонлардан бири бўлган. Кейинчалик “ўлмас телефон” номини олган афсонавий Nokia 3310 айнан мана шу моделга “меросхўр” қилиб тайёрланади.
Nokia 3310 телефони 2000 йилнинг сентябрь ойида эълон қилинган. 2005 йилда тақдим қилинган маълумотларга қараганда, ушбу моделдан дунё бўйлаб жами 126 млн дона сотилган.
Телефоннинг эргономик дизайни, 84 Х 48 пиксель сиғимли яшил тусдаги экрани, SMS-хабар ва унга ўрнатилган ўйинлар моделнинг муваффақиятини таъминлаган, десак янглишмаган бўламиз.
Моделга 900 мА/соат сиғимли аккумулятор ўрнатилган. Норасмий маълумотларга қараганда нофаол ҳолатда у телефоннинг 260 соат ишлашини етган экан. Ҳақиқатан ҳам, моделнинг “узоқ хизмат қилиши” ҳақида жуда кўп фикрлар билдирилган. Шунингдек, телефоннинг корпуси ҳам элементларнинг қулай ва ҳимояли жойлашгани сабабли унинг турли зарбаларга бўлган чидамлилигини оширган. Уни юқори баландликдан пастга улоқтиришган, қаттиқ ва оғир буюмлар билан савалаб ҳам синаб кўришган. Айнан мана шу хусусияти учун ҳам телефон бориб-бориб мемга айланган. Кимлардир уни ғишт, болға, ва ҳатто қурол билан қиёслаган J.
Шунингдек, ундаги Т9 функцияси, 35 та юкланган рингтон (яна фойдаланувчи томонидан қўшимча 7 та ўрнатилиши мумкин бўлган), соат, секундомер, калькулятор ва валюта конвертери ўша вақт учун жуда қулай янгиликлар ҳисобланган.
Ҳозирги пайтга келиб бундай телефонлар барчага жўн туюлиши табиий. Бироқ, айнан мана шундай телефонлар бугунги нано-технологияли моделларга асос бўлганини ҳеч ким рад этолмайди.
