Nokia 2017 йилда смартфонлар бозорига қайтиши расман тасдиқланди
Аввалроқ сайтимизда машҳур Nokia бренди яна смартфонлар бозорига қайтиши ҳақида хабар берган эдик. Куни кеча эса ушбу хабар финландиялик компания томонидан расман тасдиқланди. Nokia брендидан фойдаланиш ҳуқуқига эга бўлган Финландиянинг HMD Global Oy компанияси Android платформасидаги смартфонларни Хитойнинг Foxconn компанияси билан ҳамкорликда тайёрлашни режалаштирган. Foxconn, шунингдек, Apple маҳсулотларини ишлаб чиқариши кўпчиликка маълум.
4PDA сайтида келтирилган маълумотга кўра, Nokia кейинги 3 йил давомида фирманинг маркетинг фаолиятлари учун 500 млн евро миқдорида маблағ сарфлашни режалаштирган. Қайта “тирилган” Nokia’нинг илк гаджети D1C бўлиши тахмин қилинмоқда. Янги модель саккиз ядроли Snapdragon 430 процессори, 3 ГБ тезкор ва 32 ГБ доимий хотирага эга бўлади. У Android 7.0 Nougat версиясида ишлайди.
Nokia бренди остидаги янги Android смартфонлар 2017 йилнинг иккинчи чорагида сотувга чиқарилади. Қурилмаларнинг ўзини эса февраль ойида Барселонада ўтказиладиган MWC кўргазмасида намойиш этишлари мумкин.
