Apple дунёнинг энг нуфузли бренди деб топилди
World Brand Lab мутахассислари жорий йил учун жаҳоннинг энг нуфузли брендлари рўйхатини тузишди, рейтингда Apple компанияси биринчи ўринда келмоқда, деб хабар бермоқда Regnum нашри.
Жаҳондаги энг нуфузли 500 та компания рейтингини тузиш жараёнида таҳлилчилар бренднинг бозордаги улуши, жаҳон бозоридаги етакчилиги ва мижозлар содиқлигини ҳисобга олишган. IT-гигантлар 50 та бошқа соҳа (энергетика, автомобилсозлик, медиа ва бошқа) фирмаларини ортда қолдириб, рейтингнинг энг юқори поғоналарини банд этишган.
Рўйхатдаги энг нуфузли 500 та компаниялари орасида 227 та бренд АҚШдан, 36 таси эса Хитойдан. Рўйхатга жами 28 та мамлакат брендлари киритилган. Хитойнинг Haier, Tencent, China Mobile, Huawei ва Lenovo брендлари кучли юзликдан жой олганлар.
Interbrand компанияси томонидан ўтказилган айни шундай тадқиқотда (компанияларнинг интеллектуал мулки баҳоланган) ҳам Apple 178,1 млрд долларлик натижа билан биринчиликни сақлаб қолган.
