Цукербергни раисликдан ҳайдашмоқчи!
VentureBeat нашрининг ёзишича, Facebook акционерларининг бир гуруҳи кутилмаган таклиф билан чиқди: Марк Цукербергни компания директорлари бошқаруви раиси лавозимидан четлатиш!
Таклифни улар қуйидагича асослашган: «директорлар кенгашининг раиси мустақил бўлса, у компания раҳбарларини яхшироқ кузатиши, корпоратив бошқарувни яхшилаши ва акционерлар учун зарурий тараққиёт дастурини ўрнатиши мумкин».
Бу таклифни кўтариб чиққанлар – SumOfUs назорат комиссияси истеъмолчилар гуруҳи аъзолари бўлган Facebook акционерларидир. Мазкур ташкилот корпорацияларни глобал муаммолар, масалан – иқлим ўзгариши, меҳнаткашларнинг ҳуқуқлари поймол этилиши, инсон ҳуқуқлари, коррупция ва ҳоказолар учун масъулликка чақирувчи интернет ҳамжамияти ҳисобланади.
SumOfUs капитал бозори маслаҳатчиси Лайза Линдсли сўзларига кўра, 333 мингга яқин киши Facebook’да корпоратив масъулиятни яхшилаш талаби баён этилган петицияни имзолаган; шулардан 1,5 минг нафари мазкур ижтимоий тармоқнинг акционерларидир. Линдсли хонимнинг таъкидлашича, SumOfUs’нинг тўрт нафар аъзоси акциялари Цукербергни ўз лавозимидан четлатиш бўйича таклиф беришга етарлидир.
Нашрнинг таъкидлашича, бош директорнинг бошқарув раиси лавозимида ҳам ўтириши – Tesla, Bank of America, Walt Disney Company, IBM, Amazon, Netflix ва бошқа компанияларда ҳам кенг тарқалган тажриба.
Аммо Facebook бу ташаббус гуруҳининг талабларига рози бўлиши қийин, зеро, Цукерберг компаниянинг энг йирик акционерларидан бири ҳисобланади; бу қарор эса ижтимоий тармоқнинг молиявий кўрсаткичларига салбий таъсир этиши мумкин, дейди VentureBeat.
