Apple яна жаҳондаги энг пешқадам смартфтон ишлаб чиқарувчи бўлди
Gartner тадқиқот компаниясининг ўтаётган ҳафтада олиб борилган навбатдаги ўрганишлари натижасида айни пайтда дунёда ишлаб чиқарилаётган смартфонларнинг 17.9 %и Apple компанияси ҳиссасига тўғри келиши маълум бўлди. Бунгача смартфон бозрида пешқадам бўлган Samsung’нинг мобиль алоқа воситалари бозоридаги бу галги улуши 17.8 %ни ташкил қилган. 2016 йилнинг 4-молиявий чорагида Apple 77 миллион дона iPhone сотган бўлса, Samsung 76.8 миллион дона смартфон сотишга муваффақ бўлган.
Смартфон савдосида улоқни сўнгги 8 чоракдан буён Корея Республикасининг Samsung компаниясига бой бераётган Apple учун бу навбатдаги муваффақият даври дейиш мумкин.
“Сўнгги маротаба Apple 2014 йилнинг 4-молиявий чорагида “ақлли телефон”лар бозорида пешқадамлик қилган. Ўшанда йирик экранли iPhone 6 ва 6 Plus гаджетлари унга омад келтирган эди”, дейди тадқиқот компанияси вакили Аншул Гупта.
Apple компаниясининг бу муваффақияти унинг сўнгги iPhone 7 ва iPhone 7 Plus айфон моделлари савдоси билан боғланмоқда. Шунингдек, ўтаётган чоракда Samsung смартфонларига бўлган эҳтиёж Шимолий Америка ва Ғарбий Европа мамлакатларида кескин тушиб кетган.
Samsung компаниясининг смартфон савдоси 2016 йилнинг 3-чорагидан бошлаб пасая бошлаган. Samsung Galaxy Note 7 гаджетининг ёниб кетиши билан боғлиқ ҳолатлар туфайли компания омадсизликка юз тутган.
