Тақдим қилинмаган Galaxy Note 8’нинг суратлари тарқаб кетди
2016 йилда 2,5 миллион дона омадсиз Galaxy Note 7 смартфонини бозордан қайта йиғиштириб олган Samsung компанияси бор куч-ғайратини Note туркумининг кейинги вакилини тайёрлашга сафарбар қилган.
Интернет нашрлари томонидан Galaxy Note 8 деб тахмин қилинаётган гаджет тасвири туширилган суратлар тарқатилмоқда. Ундаги смартфон яқинда намойиш қилинган Galaxy S8+ билан бир хил: ромсиз ва букик экранли дизайнга эга, шунингдек олд панел тўлиқ дисплей ва бош тугма мавжуд эмас. Фақат суратдаги флагман орқа панелининг марказида қўш объективли бош камера ўрнатилган. Galaxy S8 ва S8+ смартфонлари эса битта 12 мегапикселли модулга эга.
Модомики, суратларда чиндан ҳам Samsung Galaxy Note 8 девайси тасвирланган бўлса, корпусдан S-Pen рақамли қаламчаси учун ҳам жой ажратилиши эвазига смартфон аккумуляторининг сиғими S8 Plus’нинг қувват сиғимидан, яъни 3500 мА соатдан камроқ бўлади.
Маълум қилинишича, Galaxy Note 8 смартфони 6,4 дюймли, 4К сиғимли экранга эга бўлади. Олд камера ҳамда кўзнинг рангдор пардасини сканерлаш сенсорлари экран устидан ўрин олади. Бармоқ излари сканерининг орқа панелда мавжуд эмаслиги ҳисобга олинса, компания дисплейда виртуал сканерлаш технологиясини татбиқ қилмоқчи. Шунингдек, корпус томида ва қуйисида ташқи динамиклар ўрнатиш орқали аппаратда стерео-аудио тизими ўрнатилади. Смартфон USB-C портига ҳам эга бўлади.
Samsung рақобатда Apple’ни мағлуб қилиш учун Galaxy Note 8 флагманини “Олма”нинг кейинги девайси бўлмиш iPhone 8’дан бир неча ҳафта аввалроқ, аниқроғи 2017 йилнинг августида тақдим қилиш режасида.
