iPhone 8: “юбилей айфони”ни қарши олинг! [галерея]

Латвиялик блогер Бенжамин Гескин Apple корпорациясининг аввалги смартфонларига хос дизайн ҳамда улардаги ташқи кўринишнинг эволюцион ривожланиши асосида iPhone брендининг 10 йиллиги муносабати билан эълон қилиниши кутилаётган iPhone 8 флагманининг рендерларини эълон қилди.

Суратларда кузда тақдим қилиниши кутилаётган қимматбаҳо смартфон “аждод”ларига нисбатан фарқли кўриниш ҳамда келажакдаги смартфонларга хос стилда тасвирланган. Яъни, кутилаётган смартфон шишали олд ва орқа панелларни ўраб олган металл ромли, у чеккасидан бу чеккасига қадар фақатгина дисплейдан иборат, экран панели тугмалардан холи равишда ишлаб чиқилган. Рендерларга мувофиқ, янги айфоннинг бармоқ излари сканери олд панелда бевосита экранда ўрнатилади. Яъни, смартфон саноатида илк маротаба экранда виртуал сканер жорий қилинади.

iPhone 8 орқа панелида янгиланган кўринишдаги, яъни модуллари ёнма-ён эмас, корпуснинг юқори чап қисмида устма-уст жойлашган бош камерани кўриш мумкин. Инсайдерларнинг маълум қилишларича, бу ўзгаришдан кўзланган мақсад — Apple’нинг мазкур камерани тўлдирилган ва виртуал воқелик технологияси билан боғлаш режасидир. Бу технологиялар фойдаланувчига виртуал оламдаги маълумотлар асосида ташқи олам тўғрисида кўпроқ маълумот олиш имконини беради.

Бугунгача маълум бўлган далилларга асосланадиган бўлсак, iPhone 8 флагмани 5,8 дюймли OLED-дисплейга эга бўлади.
Янги iPhone смартфонининг анъанавий равишда сентябр ойида тақдим этилиши ва ноябр ойидан сотувга чиқарилиши кутилмоқда.