Ҳали тақдим этилмаган iPhone 8 моделини iPhone 7 билан таққослаймиз (видеотавсиф)

  •   DiMaX
  •  1639
  •  04.05.2017 11:35

Ҳали тақдим этилмаган iPhone 8 моделини iPhone 7 билан таққослаймиз (видеотавсиф)

Шу кунларда Apple янги – ромсиз iPhone 8 смартфонини чиқаришга тайёргарлик кўраётгани ҳақидаги хабарлар интернетда кўп учраяпти. Гарчи компания «у четидан бу четигача» экрандан иборат қурилма ишлаб чиқариш имкониятларини кейинги бир неча йил мобайнида ўрганиб чиққан бўлса-да, мазкур режалар яхши овоза қилиняпти ва, нима бўлган тақдирда ҳам, умуман янгича девайс шу йили тақдим этилади.

Агарда умумжаҳон тармоғида тарқалган – «яширинча» олинган фотосуратларга ишонадиган бўлсак, Apple аллақачон iPhone 8’ни оммавий ишлаб чиқаришга тайёргарлик кўрмоқда. Аввалига янги қурилманинг чизмаларини кўрдик, кейин эса шу чизмаларга асосланган смартфон концептлари эълон қилинди. Бугун бўлса iPhone 8 реал макетининг видеотавсифини ҳам кўришга муяссар бўлмоқдамиз. Нафақат тавсифи, балки видеода унинг iPhone 7 билан қиёсланганлиги ҳам муҳим аҳамиятга эга.

Видеоролик муаллифи – блогер Unbox Therapy таъкидлашича, унинг қўлидаги – ҳақиқий iPhone 8’нинг макети. Мазкур қурилма каттароқ экрани ва янгиланган дизайни билан эътиборга лойиқ. Унинг орқа панелида тикка жойлашган камера модули иккита объективга эга. LED-чақноқ эса камеранинг шу икки «кўз»и орасида жойлашган.

iPhone 8 ўлчамлари: баландлиги 149,5 мм, эни 72,5 мм. Қурилманинг қалинлиги эса, камера модули билан биргаликда 8,6 мм.ни ташкил этади. Таққослаш учун унинг битта олдинги «аждод»и – iPhone 7’нинг ўлчамларини келтирсак: 138,3×67,1х7,1 мм.

Дарвоқе, iPhone 8 моделида Lightning коннектори ўрнига икки томонли USB-C ўрнатилиши ҳақидаги миш-мишлар ўз тасдиғини топмади.

Видеолавҳа муаллифи бармоқ изи сканери ҳақида умуман оғиз ҳам очмаган, аммо шундай илғор гаджетда бу датчик бўлмаслиги мумкин эмас. Смартфоннинг орқа панелида Touch ID’ни эслатувчи ҳеч қанақа технологик тирқиш йўқлиги, олд панелда эса умуман тугмача мавжуд эмаслигини ҳисобга олсак, афтидан, биометрик модуль бевосита дисплейнинг ўзига ўрнатилган.

iPhone 8 экрани атрофида ром йўқ. Миш-мишларда айтилганидек, олд панелни 5,8 дюйм диагоналга эга сенсорли OLED-дисплей бутунлай эгаллаб олган.

Нима деб ўйлайсиз, энди iPhone 8’нинг расман тақдим этилишини кутиш қолдими, ёки ҳали у ҳақдаги маълумотлар яна тарқалармикан? Нима бўлганда ҳам, барчасидан биринчилар қаторида хабар топиш учун биздан узоқлашманг!

Terabayt.uz сайтининг видеолари: Youtube'даги каналимизда!