Galaxy J5 (2016): илғор камера ва ёрқин дисплейли ҳамёнбоп самсунг
2016 йилнинг апрелида Samsung компанияси ўзининг Galaxy туркумига кирувчи J5 смартфонини такомиллашган талқинда намойиш қилди. Янгиланган смартфоннинг 250 АҚШ долларидан сотувга чиқарилганидан кўриниб турибдики, J5 “ўрта даражали” гаджет ва асосан ҳали мустақил бюджетига эга бўлмаган ёшлар қатламини, ёхуд ҳамёнбоп, аммо бренд ҳисобланган смартфон ишлатиш орзусида бўлганларни “нишонга” олади.
Осиё минтақасида Samsung Galaxy J5’нинг “SM-J510F” модели, Европа ҳамда Россияда “SM-J510FN” модели савдога чиқарилмоқда. Қуйида сизга Samsung Galaxy J5 (2016) гаджетининг LTE (Европа талқини) алоқа тармоғида фаолият кўрсатишга мўлжалланган талқини ҳақида маълумот берамиз.
Samsung Galaxy J5 (2016): Танишув
Илк маротаба 2015 йилнинг ёзида намойиш этилган Galaxy J5 смартфонининг янги талқини металл корпусга эга бўлиб, техник имкониятлари янада кенгайтирилган. Янги талқиндаги Galaxy J5 (2016) 5,2 дюймли кенгайтирилган, Super AMOLED-дисплей билан таъминланди. Смартфон 16 ГБ доимий флеш-хотирага эга. Шунингдек, унда хотирани кенгайтириш бўлмачаси ҳам мавжуд.
Samsung Galaxy J5 (2016): Дизайн
Смартфон корпуси тўлиқ металл корпусга эга. J5 замонавий услуб ва Самсунг қурилмаларига хос салобатга эга.
“Ақлли телефон”нинг олд, яъни шиша панели 5,2 дюймли экрандан иборат. Олд панелдан 2 сенсор ва 1 дона механик (Бош меню) тугма, камера, фоточақноқ, датчиклар ўрин олган.
Смартфон орқа панелида динамик, камера, фоточақноқ учун жой ажратилган.
Қурилманинг орқа панелини олиб, аккумулятор билан ёнма-ён 2 та кичик ҳажмли сим-карта бўлмачаси ҳамда 1 дона MicroSD қўшимча хотира бўлмачасини кўриш мумкин. Гаджетга сим-картани жойлаштириш учун аккумуляторни олиб туриш керак бўлади.
Galaxy J5 (2016) корпусининг ўнг томон биқинида смартфонни ишга тушириш ва блокировка қилиш тугмалари, чап биқинида эса овозни бошқариш тугмаси ўрнатилган. Корпуснинг қуйи қисмида микрофон, аудио коннектор, MicroUSB порти учун жой ажратилган.
Смартфон ўлчамлари бўйига 14,58 см, энига – 7,23 см, қалинлиги эса – 8,1 мм. Galaxy J5 гаджети 159 грамм тош босади, яъни 5,2 дюймли смартфонларга қараганда бир озгина оғирроқ. Умуман олганда қурилма ўлчами анъанавий, олд ромлар у қадар катта эмас, дисплей олд панелнинг 70 % қисмини эгаллаб турибди.
Смартфон оқ, қора, тилларанг, оч-пушти рангли талқиндаги корпусларда ишлаб чиқарилмоқда.
Samsung Galaxy J5 (2016): Процессор ва самарадорлик
Samsung Galaxy J5 девайси Qualcomm компаниясининг Snapdragon 410 процессорида ишлайди. Бу – Cortex A-53 ядросига эга 4 ядроли “электрон юрак”дир. Унинг частота тезлиги 1,2 ГГц.ни ташкил қилади. 2015 йилги J5 гаджетида ҳам шу турдаги процессордан фойдаланилган. Шунингдек, ZTE Blade A813 ($128), ASUS Zenfone 2 Laser ZE500KL ($170) каби ҳамёнбоп бўлган ўнлаб смартфонлар ҳам шу процессорда фаолият кўрсатади.
Смартфонда график-тасвирни қайта ишлайдиган Adreno 306 ёрдамчи процессори ҳам мавжуд. Маълумки, кўпчилик фикрича, Adreno 306 “ўрта даражада”ги гаджетларга ўрнатилади ва у баъзи замонавий видео ўйинларни қайта ишлашда бир оз қийналади.
Samsung Galaxy J5 (2016): Операцион тизим
Samsung Galaxy J5 (2016) аввалига Android 5.1 Lollipop операцион тизимида фаолият кўрсатган бўлса ҳам, ҳозирда унда Android 6.0.1 (Marshmallow) тизимининг мослаштирилган TouchWiz талқинини жорий қилиш имконияти ҳам яратилган. Умуман олганда, Самсунг бу борада етакчи ва тизимнинг ишлаш даражаси юқори.
Samsung Galaxy J5 (2016): Хотира
Galaxy J5’нинг тезкор хотира сиғими 2 гигабайтни ташкил қилади. Айтиш мумкинки, бу “ўрта даража” учун юқори натижа. Ниҳоят, Самсунгнинг аввалги талқинда татбиқ этилган 256 ва 512 Мб сиғимли RAM’лардан воз кечгани қувонарли. Шу сабабли, смартфонда иловаларнинг ишлаш тезлиги ҳам ёмон эмас.
Фойдаланувчи 16 Гб бўлган доимий ички хотиранинг 11 гигабайтидан фойдалана олади. Шу билан бирга, қўшимча хотира бўлмачаси орқали хотира сиғимини 128 Гб.гача ошириш мумкин. Қувонарли томони шундаки, MicroSD бўлмачаси қайсидир сим-карта бўлмачаси билан гибрид шаклида эмас, унинг учун алоҳида жой ажратилган.
Samsung Galaxy J5 (2016): Аккумулятор
Samsung Galaxy J5 2016’нинг куч-қуввати учун электр токи сиғими 3100 мА соат бўлган аккумулятор жавобгар бўлади. Бу мазкур смартфон учун жуда катта ютуқдир. Энерготежамкорлик функцияларини ҳисобга олсак, кореялик ишлаб чиқарувчининг маҳсулоти фойдаланувчини хурсанд қилади. Уни тўла қувватлаб 5 соат ўйин ўнаш, 10 соат видео томоша қилиш, 3 кун ўрта режимда фойдаланиш мумкин. Смартфонда фавқулодда қуватни тежаш режими жорий қилинган бўлиб, унда фақатгина алоқа қилиш ва СМС каби муҳим функциялар фаолият кўрсатади.
Гаджетни тўлиқ қувватлаш 2 соат, компьютер орқали 6 соат давом этади. Қурилма комплектида вилкали 1,55 А туридаги қувватлаш қурилмаси ҳам тақдим этилган.
Samsung Galaxy J5 (2016): Камералар
Бош камера 13 МП бўлиб, пиксель ўлчами стандарт, яъни 1,12 мкм оптик форматида. Ундаги f/1,9 ёруғликни ўтказувчи диафрагма сифат бўйича рақиб смартфонлар билан солиштириб кўрилганида ҳайратланарли натижалар қайд этган. Бош камера LED фоточақноқ, автофокус тизимига эга бўлиб, сониясига 30 кадрли FullHD видео ёзади.
Samsung Galaxy J5’нинг олд камера “селфисеварлар” учун айни муддао. 5 МП сиғимли сурат олувчи бу камера ҳам LED фоточақноқ билан таъминланган. Унинг диафрагмаси ҳам бош камреа каби “кучли”, яъни f/1,9.
Намуналардан кўриниб турганидек, Xiaomi камераси селфи олишда кореялик рақибларига қараганда ёруғлик балансини кўпроқ берган. LG ва J5 олган суратда эса вазият ўз ҳолича муҳрланган.
Бу суратларда эса LG ва Samsung’нинг бош камералари куч синашади. Гувоҳи бўлганингиздек, Galaxy J5’нинг рангларни бериш қобилияти тенгсиз. Унинг суратга олиши “ўрта даражали” смартфонлардан анча устун.
Бош камеранинг FullHD видео тасвир олиш имкониятига баҳо беринг:
Samsung Galaxy J5 (2016): Экран
Galaxy J5 гаджети 5,2 дюймли дисплейининг пикселлар сиғими 1280х720 белгига тенг (282 пиксель ҳар дюймда), яъни HD. Экран SuperAMOLED технологияси асосида ишлаб чиқарилган, мультитач сенсор функцияси 10 тагача уринишни қўллаб-қувватлайди. Ёрқинлик матрицага органик светодиодлар орқали етказилади ва жуда юқори. Экран силлиқ ва нафис, ёрқин ҳамда сифатли тасвир узатиш кўникмасига эга.
Samsung Galaxy J5 (2016): Коммуникация
Мобиль алоқа хизмати учун смартфонда 2 та MicroSIM бўлмачалари мавжуд. Galaxy J5’нинг “SM-J510F” модели 2G, 3G ва LTE алоқа технологияларида фаолият кўрсатишга мўлжалланган. Европа учун мўлжалланган талқин эса 4G технологиясида ҳам ишлайди. Шу билан бирга, гаджетда Wi-Fi (фақат 2, 4, 5 ГГц.ни қўллаб-қувватлаймайди) ва Bluetooth 4.1., Bluetooth ва GPS навигация алоқа технологиялари ҳам татбиқ этилган.
Янги талқиндаги Galaxy J5’нинг яна бир муҳим жиҳати шундаки, унда яқни масофада алоқа ўрнатиш – NFC технологияси ҳам жорий қилинган.
Samsung Galaxy J5 (2016): Овоз имкониятлари
Мультимедиа ва овоз имкониятлари жиҳатидан смартфон ёмон эмас. Мулоқот динамиги тоза ва баланд овоз узатади. Мусиқий карнайлар ҳам яхши ишлайди. Сифатли аудио қулоқчин бўлса, фойдаланувчи ҳузурланиб аудио тинглаши мумкин. FM радионинг борлиги ҳам мақсадга мувофиқ.
Samsung Galaxy J5 (2016): Муҳим жиҳатлари
Смартфонни бир кафтда тутиб фойдаланувчилар учун 5,2 дюймли гаджетда махсус режим ўрнатилган. Бош меню тугмасини 3 марта кетма-кет босиш орқали экранни 4 маротабагача катталаштириш ва ўнг ёки чапга ҳаракатлантириш мумкин.
Шунингдек, мобиль алоқа воситасида акселерометр, оралиқ-масофа сенсорлари, фото ва видео таҳрирлаш, ҳужжатни кўриш функциялари жорий қилинган.
Samsung Galaxy J5 (2016): Нарх-наво
asaxiy.uz интернет дўконида Samsung Galaxy J5 (2015), яъни смартфоннинг эски талқини 1,088,000 сўмдан, янги талқини эса 1,504,000 сўмдан сотилмоқда. 14 июль ҳолатида “Малика” савдо марказида эски талқин Galaxy J5 1,000,000 сўмдан сотилмоқда.
Samsung Galaxy J5 (2016): Хулоса
Samsung Galaxy J5 фотосуратга олишни хуш кўрадиганлар аудиторияси учун айни муддао. Айниқса, селфи ишқибозлари учун. Шунингдек, узоқ вақт қувват ҳақида қайғуришни истамайдиганлар ҳам ундан фойдаланишса, хурсанд бўлишади. Смартфон тизими ҳам барқарор ишлайди. 5,2 superAmoled экран ҳам “ўрта даража” гаджет учун юқори сифат белгисидир.
Доимгидек, танлов яна ўзингизнинг қўлингизда. Бозорингизни берсин!
