Galaxy J5 Prime & J7 Prime: бренднинг ҳамёнбоп-оммабоп “эгизак”лари

Samsung Galaxy J – мобил телефонлар бозорининг энг таниқли смартфон туркуми. Боиси, ушбу туркумдан таниқли фирма бренди остида ҳамёнбоп ва яхши жиҳатларга эга смартфон моделлари ўрин олган. Samsung 2016 йилнинг 2 та янги телефон моделларини — 5.00 дюймли Samsung Galaxy J5 Prime ҳамда 5.50 дюймли J7 Prime’ни тақдим қилган эди.

Бу талқин бир оз аввал — 2016 йилнинг март ойида тақдим қилинган Galaxy J5 (2016) ва Galaxy J7 (2016) смартфонларидан катта фарқ қилмайди. Мисол учун, уларнинг аккумулятор қуввати 500-600 мА соат камроқ, дисплейи 2 дюймга камроқ бўлади. Аммо, Prime талқинида процессор фаолияти бир оз самарали, қолаверса бу талқиндаги қўшимча хотира бўлмачаси 256 ГБ сиғимли хотирани қўллаб-қувватласа, Galaxy J5 (2016) ва Galaxy J7 (2016)’да бу 128 ГБни ташкил қилади. Шунингдек, Prime талқинида NFC, яъни яқин масофада алоқа ўрнатиш технологияси мавжуд эмас. Аммо, унда бармоқ излари сканери бор. Galaxy J5 (2016)’да эса бу сенсор йўқ.
Samsung Galaxy J5 (2016)’нинг яна бир муҳим жиҳати — олд камерасида ҳам фоточақноқнинг мавжудлиги.

Қолган жиҳатлари Galaxy J5 (2016) ва Galaxy J7 (2016) билан бир хил.

Samsung galaxy j7 prime

Дизайн ва бошқарув

Samsung Galaxy J5 Prime ҳамда J7 Prime телефонлари бир-бирига ўхшаб кетади — дизайн ечими, тўлиқ металл корпус.

Металл корпуси эвазига Samsung Galaxy J5 Prime ва J7 Prime смартфонлари пишиқ ва замонавий услубга хос дизайндаги гаджет сифатида таассурот уйғотади. Улар 167 ва 143 грамм тош босади. Гаджетлар қора ва тилла ранг талқинли корпусларда бозорга чиқарилган.

Ҳар иккала телефон аппаратининг олд панели томонлари 2.5D эффектли қайрилган шиша билан қоплангани боис, улар кўринишидан қиммат смартфонларни эслатиб юборади.
Олд панел қуйисидаги бош тугмада бармоқ излари сканери мавжуд. Тугманинг икки томонида виртуал тугмалар мавжуд.

Корпус ўнг томонида гаджетни ишга тушириш тугмаси, чап томонида овозни бошқариш тугмаси ўрнатилган. 3,5 мм.ли аудио туйнук ҳамда қувватлаш учун MicroUSB порти Samsung Galaxy J5 Prime ва J7 Prime корпусининг қуйи қисмидан ўрин олган. Samsung компаниясининг рамзи ҳар иккала смартфоннинг орқа панелининг юқори қисмидан ўрин олган.

Samsung Galaxy J7 Prime

Корпуснинг чап ёнида nanoSIM-карталар учун 2 та ҳамда қўшимча хотира microSD-карта учун 1 та алоҳида, жами 3 та бўлмача ажратилган.

Ўлчамлари: Samsung Galaxy J5 Prime: 142.80 x 69.50 x 8.10 мм;
Samsung Galaxy J7 Prime: 151.50 x 74.90 x 8.10.

Samsung Galaxy J7 Prime

Дастурий таъминот
Иккала модел ҳам заводдан Android 6.0 операцион тизимида чиқарилади. Уни янгилаб олиш мумкин. Қуйида эса биз ундаги муҳим иловалар хусусида тўхталамиз.

Samsung Galaxy J5 Prime ҳамда J7 Prime’да қувват тақсимотини назорат қилиш мумкин бўлган S Power Planning тизими ҳамда маълумотлар хавфсизлигини таъминлайдиган S Secure иловаси мавжуд.

Samsung Galaxy J7 Prime

Мисол учун, S Power Planning тизимида қўнғироқни амалга ошириш учун зарур қувватни олдиндан заҳиралаб қўйиш режими бор. Қолаверса, қувватни тежаш ва қувват тугаб қолганида қўнғироқни бошқа рақамга йўналтириш (переадресация) қилиш ҳам мумкин. Қувватни тежаш режими смартфондаги баъзи функциялар фаолиятини вақтинча чеклайди ва бунинг ёрдамида смартфон тўлиқ қувватининг ишлаш муддати 2 баробарга ошади.

S Secure эса тизимда хавфсизлик ҳамда махфийликни таъминлайди. Мисол учун, унинг ёрдамида зарур иловаларни блокировка қилиш ва бекитиб қўйиш, маълумотларни шифрлаш мумкин.

Samsung galaxy j5

Дисплей ва платформа

Galaxy J7 Prime 5,5 дюймли Full-HD (1080×1920 пикселли) IPS-дисплейга эга. Экран намойиши ёрқин ва аниқ. Ҳатто қуёшли ёрқин кунда ҳам бу экранда ўқиш ёки чатда суҳбат қуриш мумкин. J5 Prime HD сиғимли (720×1280 пикселли) дисплейга эга. У ҳам тасвирни ёрқин ва аниқ намойиш этади, қуёш нурларида ўзини йўқотиб қўймайди. Ҳар иккала экран Corning Gorilla Glass 4 ҳимоя шишасига эга.

Galaxy J7 Prime 1.6Ггц частота тезлигида ишлайдиган 8 ядроли Exynos 7870 процессорига ҳамда сиғими 3 ГБ бўлган тезкор хотирага эга. 2 ГБ тезкор хотира ўрнатилган Galaxy J5 Prime эса частотат тезлиги 1,4 ГГц бўлган 4 ядроли процессорда фаолият кўрсатади. Ҳар иккала смартфоннинг доимий хотираси 16 ГБ ҳамда улардаги microSD бўлмачачи 256 гигабайтгача бўлган хотира флешкасини қўллаб-қувватлайди. Ҳар иккала гаджет 2 та SIM картани қўллаб-қувватлайди.

Камера

Samsung Galaxy J7 Prime’да ҳам, Galaxy J5 Prime’да ҳам 13 мегапикселли бош камера ўрнатилган. Унинг диафрагма стандарти f/1.9 ҳамда светодиодли фоточақноққа эга. Шунингдек, J7 Prime 8 мегапикселли, Galaxy J5 Prime 5 мегапикселли селфи-камера билан таъмин қилинган.

J7 Prime бош камераси ёруғлик яхши шароитда сифатли суратга олади. Селфи ҳам ёмон чиқмайди. Galaxy J5 Prime бош камераси эса деталларни муҳрлашда бир оз оқсайди. Аммо унинг олд камераси ҳам селфиларни яхши олади.

Қувват ва сенсорлар

Samsung Galaxy J5 Prime ва J7 Prime’нинг батареясининг электр токи сиғими ҳам фарқли: J7 Prime’да 3300 мА соат ва J5 Prime’да 2400 мА соат.

Ҳар иккала гаджет оралиқ-масофа, акселерометр ва ташқи ёруғлик даражасига кўра экран ёруғлигини созлайдиган сенсорларга эга.

Хулоса

19 апрел ҳолатида “Малика” савдо марказида Samsung Galaxy J5 Prime 1.2 миллион, J7 Prime 1.6 млн сўмдан сотилмоқда. Пишиқ-пухта йиғилган металл корпусли, бармоқ излари сканери мавжуд, ёрқин экранга эга ҳамда яхши камерали, S Power Planning ва бошқа функциялар билан таъминланган Samsung смартфони учун бу ёмон нарх эмас.