19 ёшли бола Россия олигархларини кузатмоқда

19 ёшли бола Россия олигархларини кузатмоқда

Жек Свини, флоридалик 19 ёшли коллеж талабаси ўтган йили очиқ маълумотлардан ва қўшимча ботлардан фойдаланган ҳолда миллиардер Билл Гейтс, Жефф Безос, Илон Маск ва бошқаларнинг шахсий самолётини реал вақтда қаердалигини кузатиш имконини берувчи Twitter аккаунтни ишга туширган эди ва бу жуда кўплаб томошабинларни ўзига жалб қилди, хусусан, Илон Маскни ҳам.

Ўзининг кузатилаётганини билган миллиардер Маск, биронта тентак томонидан отиб кетилишни истамаслигини айтиб, шу йилнинг бошида ботни ўчириш учун Свинига $5.000 ҳам таклиф қилган, аммо, коллеж талабаси нархини $50,000 гача кўтарганидан кейин Маск суҳбат тарихини ўчириб, Свини блоклаб қўйганди. 

Интернетда яхшигина танилиб олган Жек эндиликда мухлислари томонидан Россия-Украина воқеалари сабаб таниқли рус олигархларининг самолётларини кузатиш "буюртма"сини олган ва ҳозирда Russian Oligarch Jets номли яна бир Twitter аккаунтни ишга туширган ва аккаунт бир неча кун ичида 100 мингдан ортиқ обуначиларни ўзига жалб қилган. Унда сиз Владимир Потанин, Олег Тинков, Челси футбол клуби эгаси Роман Абрамович, асли ўзбекистонлик бўлган Алишер Усмонов ва яна бошқа 20 дан ортиқ Россия миллиардерларининг 40 га яқин шахсий самолётлари ва вертолётларининг қаердалиги, қаердан қаерга учаётганлигидан хабардор бўлиб туришингиз мумкин. 

Свини Bloomberg'га берган интервюсида рус бойлариникидек самолётларни кўрмаганлигини ҳам айтиб ўтди: "Бундан олдин мен бундай нуфузли олигархлар борлигини ҳам билмасдим. Бу олигархларнинг самолётлари мутлақо ажойиб. Уларнинг самолётлари бошқа реактивларга қараганда жуда катта", дейди Свини Россиянинг энг бой одамлари Airbus А319 ва Boeing 737 каби тижорат ўлчамдаги самолётларда саёҳат қилишини билганидан кейин. 

ЎҚИНГ: Хакерлар Россияни тинч қўйишмаяпти

Сайт янгиликларидан доимий хабардор бўлиш учун Телеграм каналимизга қўшилинг!