2 ва 6 апрелда Samsung тақдим этаётган икки гаджет: нарх ва жиҳатлари
Samsung компанияси, турли нарх тоифаларига мансуб смартфонлардан ташқари, бошқа тур девайслар борасида ҳам етакчиликка интилмоқда. Жумладан, апрелнинг биринчи ҳафтасидаёқ у битта планшет ва хромбукини намойиш қилади.
ЎҚИНГ: Samsung учта моделдаги флагманлари эгаларини хафа қиладиган бўлди
Булардан биринчиси, яъни 2 апрелдаёқ намойиш этиладигани – Galaxy Tab S6 Lite русумли планшетдир. У аллақачон Германиядаги Amazon интернет-дўконига тасодифан чиққан ва шу боисдан нархлари ҳам маълум. Мазкур девайснинг LTE-версияси учун 430 евро миқдорида нарх белгиланган. SIM-карта слоти бўлмаган, фақат Wi-Fi модуллиси эса арзонроқ – 399 евро туради.
Samsung Galaxy Tab S6 Lite якка кристалли Exynos 9611 процессорига, 4 гигабайтлик тезкор ҳамда 64 ёки 128 гигабайтлик флэш-хотирага эга бўлиб, яна microSD картаси учун уячаси ҳам бор. Диагоналига 10,4 дюймлик LCD-дисплейининг тасвир аниқлиги 2000х1200 пикселлик. Экран, анъанавий тарзда, S Pen электрон перони қўллаб-қувватлайди.
Планшетнинг олд камераси 5, асосий камераси эса 8 мегапикселлик. Samsung уни GPS, Wi-Fi 802.11ac, Bluetooth 5.0 ҳамда NFC модуллари билан таъминлаган. Корпусида USB-C порти ва стандарт – 3,5 миллиметрлик қулоқчин тирқиши мавжуд. Қурилма Android 10 операцион тизим талқини базасида тайёрланган One UI график қобиғи бошқаруви остида ишлайди.
ЎҚИНГ: Samsung ҳамёнбоп ва «бели бақувват» Galaxy Tab A 8.4 планшетини чиқарди
Жанубий кореялик гигант тайёрлаган Samsung Galaxy Chromebook лаптопи эса 6 апрелда намойиш қилинади. Унинг аппарат таъминоти асосини Intel Core i5-10210U процессори ташкил этади. Ноутбукнинг LPDDR3 тоифали тезкор хотираси 8 гигабайтлик бўлса, доимий хотира сифатида 256 гигабайтлик SSD-чип қўлланган.
Ноутбук диагоналига 13,3 дюймлик AMOLED-дисплейга эга бўлиб, экраннинг юқори ва ён ҳошиялари атиги 3,9 миллиметрлик ромга эга. Тасвир аниқлиги 3840х2160 пикселлик, у рангларнинг кенгайтирилган HDR 400 динамик диапазонини қўллаб-қувватлайди.
ЎҚИНГ: Windows 10 тизимли компьютер ёки ноутбук «қотиб» қолса...
Девайснинг корпуси алюминий қотишмасидан тайёрланган бўлиб, иссиқликни тарқатишга ҳам хизмат қилади. Galaxy Chromebook умумий қалинлиги атиги 9,9 мммиллиметрга, вазни эса 1,04 килограммга эга. Ундаги клавиатурали ва экранли қисмлар бир-бирига нисбатан 360 даражада – тескарисига ҳам букила олади.
Galaxy Chromebook литий-полимерли аккумулятор, иккита USB-C порти, TF туридаги хотира картаси слоти, шунингдек, S-Pen стилуси билан таъминланган. Samsung расман тасдиқлашича, ушбу юпқа дизайнерлар ноутбуки 6 апрелданоқ икки хил – Carnival Red ҳамда Mercury Gray рангли вариантларда, 999 доллардан сотила бошлайди.
