200MP камерали Xiaomi смартфонининг жонли сурати тарқатиб юборилди
Ўтган ҳафтада тақдим қилган Moto Х30 Pro смартфони билан Motorola дунёдаги илк 200MP камерали мобил телефон ишлаб чиқарган компания бўлди. Аммо, унинг "битталиги" узоққа бормайдиганга ўхшайди, бир неча ҳафтадан бери Xiaomi'нинг ҳам 200MP камерали смартфони ҳақида миш-мишлар тарқалмоқда. Узунқулоқнинг "Redmi K50 Ultra ана шундай камерага эга бўлади" деган гаплари бироз нотўғри бўлиб чиқди, смартфон 108MP камера билан эълон қилинди. Лекин, Xiaomi ростдан ҳам рекорд даражадаги камера сенсорига эга смартфон устида ишлаётган кўринади, бу сафар қуруқ гап эмас, балки, смартфоннинг жонли сурати тарқатиб юборилди.
Phonandroid томонидан тақдим қилинаётган расмда Redmi K50 Ultra'никига ўта ўхшаш бўлган, бироқ, LED чироғи пастида "200MP" ёзувли камера оролига эга смартфонни кўриш мумкин. Маълум бўлишича, бу бўлажак Xiaomi 12Т Pro модели бўлиб, у Redmi K50 Ultra'нинг глобал бозорга чиқариладиган варианти эканлиги айтилмоқда.
Таъкидлаш жоизки, Redmi K50 Ultra смартфони 22081212C модел рақамига эга бўлса, Xiaomi 12Т Pro смартфони 22081212UG модел рақамига эга. Бу ерда рақамлардан кейинги "C" ҳарфи "China", яъни Хитой бозорини билдирса, "G" ҳарфи "global", яъни бутунжаҳон бозори учун эканлигини англатади. Шундай экан, янги смартфоннинг техник хусусиятлари борасида камерадан бошқа ўзгаришлар бўлмаслиги мумкин: 6.67 дюймли, 144 гигагерцли экран, Snapdragon 8+ Gen 1 чипсети, 8/12GB RAM, 128/256/512GB хотира, 5000 мА/с батарея, 120 Вт тезликда қувватланиш ва бошқалар.
Миш-мишларга кўра, Xiaomi 12Т Pro келаётган сентабр ойида тақдим қилинади ва 850 евро нархда сотувга чиқарилади.
ЎҚИНГ: Хиаоми компанияси Redmi K50 Ultra смартфонини тақдим этди
