Acer компанияси 16 дюймли энг енгил ноутбукни тақдим қилди
Ноутбуклар портабиллиги билан қулай, шундай экан улар кўтариб юриш учун енгил бўлиши керак. Acer бу борада ўзининг Swift ноутбуклари билан етакчилик қилади ва кеча компания худди шу бренд остида яна бир янги ноутбук чиқарди: Swift Edge ноутбуки Apple'нинг М2 чипли MacBook Air (1.2 кг) ноутбукидан ҳам енгилроқ – унинг оғирлиги атиги 1.1 килограммни ташкил қилади. Таъкидлаш жоизки, бу 16 дюймли ноутбуклар орасида энг енгилидир. Компания бу натижага эришиш учун ноутбук корпусини магний-алюминий ясаган. Шунингдек, ноутбук 13 миллиметр қалинликка эга.
Acer Swift Edge'нинг яна бир эътиборли жиҳатларидан бири шундаки, у 60 герц янгиланиш тезлиги, (3840 х 2400) 4К резолюция таклиф қила оладиган OLED дисплейга эга ва у 500 нит HDR ёрқинликка чиқа олади. Экраннинг танага нисбати 92 фоизни ташкил қилади. OLED дисплейли ноутбукларнинг энг катта муаммоси бу экраннинг "қувватга тўймас"лигидир, лекин Acer'нинг маълум қилишича, Swift Edge'нинг учлик 54 Вт батареяси 10.5 соатлик видео кўриш ёки браузерда 8.5 соат ишлашга етади.
Капот остида ноутбук 8 ядроли, 2.70 гигагерц тезликка эга AMD Ryzen 7 6800U процессори билан жиҳозланган. Графика ҳам процессор билан интеграциялашган RDNA2 бўлиб, у ўйинларни 1080p'да ўйнаш имконини беради. Қолаверса, ноутбук Microsoft'нинг Windows 11 операцион тизимини қўшимча ҳимоя билан таъминлайдиган Pluton хавфсизлик процессорини ҳам қўллаб-қувватлайди. Унинг 16ГБ LPDDR5 оператив хотирасини 32ГБ гача, 512ГБ SSD доимий хотирасини эса 1ТБ SSD гача кўтариш мумкин.
Қўшимчасига, ноутбук 1,920 х 1,080 веб камера, микрофон, иккилик динамикалар, ҳамда, бармоқ изини аниқлаш сенсорига ҳам эга ва у Wi-Fi 6E, Bluetooth 5.2 технологияларини қўллаб-қувватлайди. Ноутбукда 20Гб/с тезликда маълумот узатилиши, монитор уланиши ва 65 Вт тезликда зарядлашни қўллаб-қувватлайдиган иккита USB 3.2 Gen 2 Type-C, шу билан бирга, 2та USB 3.2 Gen 1 Type-A, HDMI, 3.5 мм симли наушник уяси ва хавфсизлик учун Noble Wedge Lock уяси мавжуд.
Ваниҳоят, Acer Swift Edge ноутбуки нархига келадиган бўлсак, унинг AMD Ryzen 7 6800U, 16 ГБ RAM, 1ТБ SSD юқори техник конфигурацияли модели 1499 доллар нархда Шимолий Америкада, 1499 евро (1459 доллар) нархда Европа, Яқин Шарқ ва Африкада, 7999 юан нархда Хитойда сотувга чиқарилган.
