Android ва iOS’да овозли матн теришни таққослаймиз

  •   DiMaX
  •  2283
  •  28.03.2017 12:41

Android ва iOS’да овозли матн теришни таққослаймиз

Смартфонлар шу даражада ақллилашиб улгурдики, энди улар овозли буйруқларимизни ҳам англаб, биз айтган керакли вазифаларни бажаришяпти. Клавиатураларнинг кўпчилигида аллақачондан бери овозли матн териш функцияси мавжуд. Хўш, амалда-чи, уларнинг ишлаши қай даражада?

Бугун шу функция имкониятлари иккита етакчи ва азалий рақиб – iOS ва Android мобиль операцион тизимларида қандай йўлга қўйилганлигини кўриб чиқамиз.

APPLE’ДАГИ ОВОЗЛИ МАТН ТЕРИШ

Созлаш

iPhone, iPad ва iPod’да сизни тинглайдиган асосий илова Siri ҳисобланади. Бевосита клавиатура учун унинг ёрдамчиси – «Диктовка» амал қилади. Уни ишга тушириш учун қурилма созламалари – «Настройки»га кириб, асосийлари – «Основные»ни танлаймиз. Кейин «Клавиатуры» менюсини очамиз, саҳифанинг охиригача тушиб, «Включить диктовку» опциясини ёқиб қўямиз.

Шундан кейин клавиатурада микрофон белгичаси пайдо бўлади:

Нутқни англаш сифати

Apple гаджетлари билан «гаплаш»аётганингизда, баланд овозда гапиришингиз шарт эмас. Аммо қурилмани оғзингизга яқинроқ тутишга ҳаракат қилинг, айниқса, атрофда бошқа товушлар ҳам бор пайти. Эътибор беринг: нутқни англаш сифати девайснинг шу лаҳзадаги жойлашув ҳолатига бевосита боғлиқ. iPhone’да иккита микрофон мавжуд бўлиб, иккалови ҳам пастда жойлашган, iPad’да эса биттагина – юқори ён томонида. Шундай экан, iPad’да микрофонга гапириш учун маҳорат ҳам керак бўлади, зеро, микрофонга гапираётган пайтингиз экранга ҳам қараб тура олмайсиз-да.

iPhone шовқинли бино ичида ёки кўчада пайти нутқни iPad’дан кўра яхшироқ англаб олади, чунки унда шовқинни камайтириш учун қўшимча микрофон мавжуд. Шунингдек, гарнитураларни қўллаганда барча Apple қурилмаларида ҳам нутқни таниш сифати анча юқори бўлади.

Тўғри, Apple гаджетларида барибир нутқни англаш сифати – баҳсли мавзу. Лекин «Диктовка» кенг кўламдаги овозли буйруқлар тўпламини тақдим этади. Масалан, «Запятая» десангиз – вергул қўяди. Рус тилидаги барча тиниш белгилари учун шунақа овозли буйруқлар мавжуд. Агар «С новой строки» десангиз, кейинги айтиладиган матн янги қатордан ёзила бошлайди. Худди шундай, янги параграфдан матн тера бошлаш ҳам мумкин. Норасмий суҳбатда эса матн охирига смайлик қўйиш ҳам мумкин: бунинг учун «Смайлик», ғамгин смайлик учун эса «Грустный смайлик» ёки кулаётгани учун – «Смеющийся смайлик» дейишингиз етарли.

Агарда сўзни бош ҳарф билан бошлаш керак бўлса, «С заглавной буквы» десангиз бас – ўзи тушуниб олади. Бу опция, айниқса, матнда бирор муассаса ёки асар номини кўрсатишда фойда беради. Бироқ кўпчилик номлар тизимга аввалдан таниш, масалан, шунчаки «Манчестер Юнайтед» десангиз, «Диктовка» унинг футбол клуби номи эканини ўзи билади ва айтмасангиз ҳам бош ҳарф билан ёзади.

Табиийки, айрим сўзларнинг таги кўк рангли узуқ чизиқ билан чизилганини пайқагандирсиз. Гап шундаки, нутқни англаш тизими ҳам ўзининг жуда билимдон эмаслигини билади. У шунақа тагини чизиб қўйган сўзларга ўзингиз қайтиб, текшириб кўришингизни истайди. Агар ўша сўзнинг устига боссангиз, тизим унинг эҳтимолий вариантларини таклиф этади, «балки мана бунақа демоқчи бўлгандирсиз, мен яхши эшитмай қолгандирман…» дегандек.

Хатолар кўплиги ғашга тегиши мумкин, лекин, масалан, эслатмалар ўрнатиш ёки хабар юбориш учун Siri ишлатсангиз, бу унчалик қўрқинчли эмас. Шунингдек, тизим контактларни ҳам танишини таъкидлаб ўтиш ўринли: оддий исм-фамилияларни ҳам, мураккаброқларини ҳам англайди. Бу эса вақтингиз тиғиз пайти жуда асқотади.

«Диктовка» айрим хорижий сўзларни ҳам танимай қолади. Масалан, қуйидаги мисолда «PlayStation»ни у муаммосиз англаган, лекин «Doom» ва «Uncharted» сўзларини тушунмаган.

Яхшиланиб борадими?

Бошланғич босқичда Siri нутқни англашда жуда кўп хатоларни ўтказиб юбораётган бўлса, унга қўл силтаб қўйманг. Унинг алгоритми сизнинг сўзлаш оҳангингизни эслаб қолиб, сиз киритаётган тўғрилашларни инобатга олиб, нутқингизни тобора тўғри англай боради. Бу анча вақтни тежашга ёрдам беради; ахир, овозли матн киритишнинг асосий вазифаси ҳам шу-ку.

GOOGLE’ДАГИ ОВОЗЛИ МАТН ТЕРИШ

Созлаш

Android’нинг сўнгги версияларидаги Google овозли матн териш хизмати «Ассистент» иловаси таркибига киритилган ва уни кўплаб дастурлар ичида қўллаш мумкин. Бундан ташқари, ташқи клавиатура иловаларининг ҳам аксариятида овозли матн териш опцияси мавжуд, улар ҳам бунда кўпинча Google’нинг тизим имкониятларидан фойдаланишади.

«Ассистент» ёки Google Now’да овозли қидирувни созлаш учун созламалар – «Настройки»ни очиб, овозли қидирув созламалари, яъни «Голосовой поиск» бўлимига ўтиш лозим. Шу ерда сиз «О’кей, Google» калит сўзининг англанишини ҳамда овозли бошқарувнинг бошқа параметрларини созлашингиз мумкин.

Овозли матн киритиш функциясини чақириш учун клавиатурадаги микрофон тугмачасига бироз муддат босиб туриш керак бўлади. Шунда овозли матн киритиш интерфейси очилади ва унга айтиб туриб ёздира бошлашингиз мумкин.

Нутқни англаш сифати

Кўча-кўйда узун матнли хабарларни қўлда ҳарф териб ёзиш мушкул. Android-смартфонларда овозли матн теришдан фойдаланса бўлади, лекин у ҳам мукаммал эмас. Барибир буни яхшилаш имкони бор: Google’да ҳам, худди Apple’даги каби, тиниш белгиларини овоз орқали қўйиш функцияси мавжуд. Овозли матн теришда телеграмма услубида гапирган маъқулроқ – аниқ, қисқа ва тиниш белгилари бор жойда тунуффуслар билан. Барибир унда, масалан, «Зайка, купи, пожалуйста, мороженку и вкусняшек на вечер» деган гапни айтиб туриб тўғри ёздириб бўлмайди. Лекин «Купи мороженое и сладкое на вечер», десангиз бўлади. Агарда қурилмангиз микрофони яхши бўлса, бошқа шовқинлар сизнинг нутқингизни босиб кетмайди. Асосийси – телефонингиз сизни «эшитсин».

Google яхши танимаган сўзлар тагида кул ранг чизиқ билан ажратиб кўрсатилади. Унинг устига боссангиз, уни таҳрирлаш учун эҳтимолий вариантлар луғатчаси очилади. Сиз киритишларни қанчалик тез-тез таҳрирлаб борсангиз, вақт ўтиши билан у шунчалик аниқ ишлайдиган бўлиб боради.

Овозли ёрдамчи билан мулоқотда Google яхши ишлайди. Кўчада ёки уйда овоз ёрдамида Google’га турлича топшириқлар бериб бориш мумкин: эслатмалар ва қайдлардан тортиб, уйғотгични созлашгача. Бу жуда қулай ва деярли идеал даражада амал қилади. Фақат битта муаммо бор: агарда телефон стол устида ётган бўлса ва овозни англаш жараёнида иш столи горизонтал («портретный» эмас, балки «альбомный») ҳолатда турган бўлса, нутқни англаб бўлганидан сўнг Google ундан нимани сўраганингизни эсдан чиқаради ва шунчаки экранни ўчириб қўяқолади. Телефон одатда ясси юзада ётади ва унинг иш столи қай ҳолатда эканини қарамасдан туриб аниқлаш мушкул.

Яхшиланиб борадими?

Албатта! «Ассистент» билан ишлашингиз жараёнида, у мунтазам тарзда яхши томонга ўзгариб боради. Google ўзининг барча иловаларига, жумладан, овозли қидирув тизимига ҳам нейротармоқларни фаол тарзда жорий этиб келмоқда.

Афсуски, бу янгиликлар рус тилига кечикиброқ кириб келади, ўзбек тилига эса – анча кеч. Шундай бўлса-да, барчаси яхшиланиб боради ва келажакда овозли ёрдамчилар билан ишлашнинг қулайликларидан фойдалансак бўлади.

Сайт янгиликларидан доимий хабардор бўлиш учун Телеграм каналимизга қўшилинг!