Apple анчадан бери тайёрлаётган бестселлерини ёпиқ тақдимотда кўрсатди
Купертинолик корпорация тўлдирилган борлиқ ҳамда аралаш реаллик технологияларига эга кўзойнак тайёрлаётгани ҳақида бултурдан бери хабарлар тарқалган. Apple ҳатто бу соҳадаги янгиликлардан бохабар бўлиш учун, гарчи ўзи иштирок этмаса-да, CES 2019’га ўз мутахассисларини «жосус тарзида» жўнатган. Лекин...
ЎҚИНГ: Apple энг кутилаётган инновацион девайсини умуман чиқармайдиган бўлди!
Инсайдерлар берган маълумотларга кўра, Apple яна бу борада ўз фикрини ўзгартирган ва ўтган ойда ўз ходимлари билан махфий йиғилиш ўтказган. Корпорация унда ўзининг тўлдирилган борлиқ (AR) гарнитураси ҳамда янада такомиллашган AR-технологияли кўзойнаги йўналишидаги режаларини баён этган.
Йиғилишда Apple вице-президенти Майк Роквелл (Mike Rockwell) компаниянинг бошқа раҳбарлари иштирокида намойиш қилган. Унда янги AR-гарнитуранинг дизайни ҳамда ўзига хосликлари кўрсатиб берилган. Таъкидлаш ўринлики, Роквелл айнан тўлдирилган ва виртуал борлиқ йўналишидаги тадқиқотлар бўйича Apple жамоасининг раҳбаридир.
Аввалроқ тарқалган миш-мишларга кўра, кутилаётган инновацион кўзойнак Apple Glasses (ёки Apple Glass) деб номланиши мумкин. Махфий йиғилишда айтилишича, AR-гарнитура 2022 йилда тақдим этилади, бир йил ўтиб эса Apple ўзининг «ақлли» кўзойнагини намойиш қилади.
