Кутилганидек: Apple ортиқча дабдабаларсиз ўзининг янги планшетларини тақдим қилди

Кутилганидек: Apple ортиқча дабдабаларсиз ўзининг янги планшетларини тақдим қилди

Apple компанияси ўзининг олтинчи авлод iPad Pro планшетини ҳеч қандай тақдимотларсиз намойиш қилди. Компаниянинг энг сўнгги флагман планшети М2 чипи билан жиҳозланган бўлиб, у 12.9 ва 11 дюймли экран ўлчамларида чиқарилган.

Салкам 13 дюймли iPad Pro модели Mini LED технологиясига асосланган дисплейга эга ва бу билан планшет яхшиланган контраст ва янада эффектли HDR билан ишлаш имконини беради. Кичик экранли модел эса оддийроқ экранга эга, лекин уларнинг иккови ҳам Apple'нинг ProMotion, 120 герц янгиланиш тезлигини қўллаб-қувватлайди.

Планшетлардаги эътиборли янгиланишларнинг бир шундаки, уларнинг экрани энди Apple Pencil қаламини (12 миллиметргача яқинликда) ҳавода муаллақ турганда ҳам сеза олади. Apple'нинг таъкидлашича, ушбу хусусият фойдаланувчиларга "ўз белгиларини олдин кўриш" имконини беради. Масалан, "Scribble билан қалам экранга яқинлашганда матн майдонлари автоматик равишда кенгаяди ва қўл ёзуви матнга тезроқ айланади." дейди Apple.

Таъкидлаш жоизки Samsung смартфон ва планшетлари эгалари учун бундай функция аллақачон таниш, ёхуд Galaxy S5 смартфони бармоғингизни экранга теккизмасдан яқинлаштирсангиз, нарсадаги маълумотларни олдиндан кўришингиз мумкин эди.

Камералар борасида планшетлар 12МП олд сенсор (+FaceID) билан жиҳозланган бўлиб, у видео қўнғироқлар вақтида сизни марказда ушлаб турган ҳолда рамкани автоматик равишда созлайдиган Center Stage хусусиятига эга. Орқа томода эса 12МП ва 10МП (ултра-кенг) камералар мавжуд бўлиб, уларга LiDAR сканери ёрдамчилик қилади.

Ичкарида қурилма iPadOS 16 билан ишлайди ва у узоқ кутилган Stage Manager хусусиятига эга. Ушбу функция иловалар ва ойналарни автоматик равишда тартибга солади, шу билан бирга, вазифалар ўртасида тез ва осон алмашиш имконини беради. Apple'нинг қўшимча қилишича, Stage Manager кейинроқ 6К'гача бўлган қўшимча дисплейларни ҳам қўллаб-қувватлашни бошлайди ва планшетда тўртта, қўшимча дисплейда тўртта иловалар билан ишлай оладиган бўлади.

Бошқа Apple планшетлари учун ушбу версия 24 октабрдан бошлаб тарқатилиши ҳам маълум бўлди.

Олтинчи авлод iPad Pro билан симсиз уланишлар ҳам яхшиланган: планшетлар энди Wi-Fi 6E, Bluetooth 5.3 ва янада кўпроқ жойларда 5G'ни қўллаб-қувватлайди.

Планшетлар учун космик кулранг ва кумуш рангларида олдиндан буюртма бериш аллақачон бошланган. 26 октабрдан эса улар дўкон пештахталарига қўйилади. Нархлар қуйидагича:

  128ГБ 256ГБ 512ГБ 1ТБ 2ТБ
12.9 дюймли iPad Pro $1099 $1199 $1399 $1799 $2199
11 дюймли iPad Pro $799 $899 $1099 $1499 $1899

ЎҚИНГ: Apple компанияси яна жаримага тортилди

Сайтимизнинг энг чиройли расмларини Инстаграмдаги саҳифамизда томоша қилинг!