Asus'дан янги "монстер" гейминг смартфони
Кундалик ҳаёт учун мўлжалланган телефонлар билан биргаликда гейминг смартфонлари ҳам алоҳида эътиборга олинмоқда ва уларни ишлаб чиқаришда ҳозирда Asus'дан яхшироғи топилмаяпти. Тайванлик компания кеча ўзининг узоқ кутилган ROG Phone 6 ўйин смартфонлари қаторини тақдим қилди.
Янги авлод ROG Phone смартфонлари икки моделни ўз ичига олади: ROG Phone 6 ва ROG Phone 6 Pro. Гарчи иккала моделнинг ҳам экран ўлчами олдинги ROG Phone 5S каби 6.78 дюйм, 1080 х 2448 пиксел резолюциясида бўлса-да, улар бу сафар 165Hz янгиланиш тезлиги, 720Hz сенсор частотаси ва 1,200 нитс ёруғлик даражасига эга. Таъкидлаш керакки, сиз камроқ қувват сарфланиши учун дисплейни 60Hz гача тушириб қўйишингиз ҳам мумкин. Бундай ажойиб экранни эса Corning Gorilla Glass Victus турли хил тирналишдан ҳимоя қилади. Моделларни бир-биридан ажратадиган асосий фарқлардан бири шундаки, Pro модел орқасида қўшимча 2 дюймли AMOLED дисплей мавжуд.
Капот остида уларнинг иккала модел ҳам Qualcom яқинда тақдим этган Snapdragon 8+ Gen 1 чипсетлари билан жиҳозланган ва улар Android 12 га асосланган ROG UI қобиғида ишлайди. Хотирага келганда эса моделлар турли хил модификацияга эга. Оддий ROG Phone 6 модели 12 GB дан 16 GB гача оператив хотирага эга бўлса, Pro моделида бу кўрсаткич 18 GB бўлиб, моделлар ёки 256 ёки 512 GB (UFS 3.1) кенгайтириб бўлмайдиган доимий хотира билан келади. Шунингдек, икков модел ҳам аввалгидек хавфсиз ва тезкор зарядланиш учун 3,000 дан иккига ажратилган 6,000 mAh батареяга эга ва улар 65W тезликда икки USB-C портининг бири орқали зарядланади.
Бугунги кундаги юқори графикали ўйинлари билан смартфонингиз қанчалик зўр бўлмасин унинг беш дақиқада "иситмаси чиқиши" аниқ. Бироқ Asus'да бунга ечим бор. Унинг янги ROG Phone 6 смартфонлари оптимизацияланган совутиш тизимига эга ва у билан процессор ҳароратини 10 градусгача тушириш мумкин.
Оптикага келадиган бўлсак, Asus ROG Phone 6 смартфонларининг орқасидаги учлик камераси 50 MP асосий, 13 MP ултра-кенг ва 5 MP макро сенсорига билан таъминланган. Олд томондаги селфи камера сенсори эса 12 МП ни ташкил қилади.
Қўшимчасига компания AirTrigger сенсорини турли хил яхшиланишлар билан қайтарган. Телефон иккилик олд карнайлар, учлик микрофонлар ва 3.5 мм қулоқчин уясига эга. Юқорида айтилганидек, смартфонда бир эмас, иккита USB-C портлари мавжуд. Бири қурилма тагида, яна бири эса ёнида жойлашган. Айтиш керакки, ROG Phone 6 смартфонлари IPХ4 сув ва чангга чидамлилик даражасига эга биринчи ўйин смартфонларидир.
Тадбир давомида Asus смартфонлар учун ўзининг янги версиядаги AeroActive кулери, ROG Kunai геймпадлари ва ROG Cetra True Wireless/Pro симсиз қулоқчинларини ҳам чиқарди.
ROG Phone 6 смартфонларининг оддий модели оқ ёки қора рангда 12 GB RAM ва 256 доимий хотира билан 999 евро ёхуд 71,999 рупия, юқори даражадаги Pro модели эса фақат оқ рангда 18 GB RAM ва 512 GB хотира билан 1,299 евро ёхуд 89,999 рупия нархда Европа ва Ҳиндистон бозоларида сотилади.
Ҳозирда смартфон ишлаб чиқарувчилари ўз мобил қурилмаларини иложи борича кичик қутига солишга ҳаракат қилишади, лекин Asus ундай бунинг ғирт тескарисини қилмоқда. Агар сиз ROG Phone 6 сериясидаги смартфонни сотиб олсангиз, сизга катта ҳажмдаги ва ўзига хос дизайнга эга қути келади. Унинг ичидан эса ROG Phone 6 смартфони ва унинг учун кейс, 65W қувватловчи адаптер билан USB-C кабели, SIM картани чиқариш учун игна, АR карта ва баъзи ҳужжатларни топишингиз мумкин.
ЎҚИНГ: Энг кучли Хиаоми смартфони тақдим этилди
