Айни вақтда сотиб олиш мумкин бўлган энг яхши Galaxy смартфонлари

Айни вақтда сотиб олиш мумкин бўлган энг яхши Galaxy смартфонлари

Samsung ҳар йили кўплаб янги смартфонларни сотувга чиқаради. Улар орасидан энг яхшиларини танлаб олиш кўпинча харидорларга қийинчилик туғдиради. Бюджет ҳамда флагман синфида Samsung бир қанча қурилмаларни таклиф этади.

ЎҚИНГ: Ортга назар: Galaxy A сериясининг энг яхши смартфонлари

Харидорларга ёрдам бериш мақсадида, биз ҳозирда сотиб олиш мумкин бўлган энг яхши Galaxy смартфонларининг рўйхатини тузиб чиқдик.

Ушбу рўйхатдан янги Galaxy букламафонлари ҳамда флагман, ўрта тоифа, бюджет синфига кирувчи смартфонлар ўрин олган.

Энг кучли техник жиҳатларга эга смартфон: Galaxy S21 Ultra

Galaxy S21 Ultra ҳозирда харидорлар сотиб олиши мумкин бўлган энг унумдорлиги юқори бўлган смартфон. У энг кучли техник жиҳатларни ўзида бирлаштира олган.

Қурилма юқори сифатли 6.8 дюймли 120Hz Dynamic AMOLED 2X дисплейига эга. Ҳудудга қараб смартфон Snapdragon 888 ёки Exynos 2100 чипи билан жиҳозланган. Хотира турининг энг юқориси 16/512ГБ ни ташкил қилади, уни microSD билан кенгайтиришнинг имкони мавжуд эмас.

5,000 мАс сиғимли аккумулятор эга смартфонга, шунингдек, такомиллашган 100х гибрид зумни қўллаб-қувватловчи телефото камера ўрнатилган. Дастурий таъминотдаги янги функциялар камера имкониятларини оширган.

Қурилма S Pen'ни ҳам қўллаб-қувватлайди, бироқ уни алоҳида сотиб олишга тўғри келади. Чунки S21 Ultra'да стилус учун уя мавжуд эмас. Фойдаланувчиларга қулайлик яратиш учун компания махсус стилус учун уяга эга бўлган ғилофни сотувга чиқарди, лекин унинг нархи одатий ғилофларникидан анча қимматроқ.

Бир сўз билан айтганда, S21 Ultra ҳозирги вақтда энг юқори унумдорлик, энг яхши дисплей, дизайн ҳамда камераларга эга бўлган Galaxy смартфони ҳисобланади.

Сотиб олиш учун сабаблар: сифатли камералар, катта ҳажмли аккумулятор, сифатли дисплей, юқори унумдорлик.

ЎҚИНГ: ТераТавсиф: Samsung Galaxy S21 Ultra 5G (1-қисм)

Энг яхши кўп функсияга эга бўлган смартфон: Galaxy Note 20 Ultra

Аввалги авлод Note 10 сериясидан фарқли ўлароқ, Samsung компанияси Note 20 Ultra'га бир қанча янги имконият ҳамда функцияларни қўшди. Шунингдек, S Pen'ни ҳам такомиллаштирди.

6.9 дюймли дисплейга эга бўлган смартфон 5G тармоғини ҳам қўллаб-қувватлайди. Бундан ташқари, Note 20 Ultra динамик 120Hz янгиланиш частотасига эга бўлган биринчи Galaxy смартфони бўлди. Яъни смартфон жорий контентга қараб, 10Hz, 30Hz, 60Hz ҳамда 120Hz частоталарга автоматик тарзда ўтиб, ишлашни бошлайди. Бу аккумулятор қувватини тежашга катта ёрдам беради.

Samsung, шунингдек, олдинги аволдга қараганда камера созламаларини анча яхшилаган.1,299 долларлик флагмандан максимал даражада фойдаланишга имкон берадиган бир нечта янги дастурий таъминот функциялари ва янги камера режимлари смартфонга қўшилди. Буларнинг барчаси Galaxy Note 20 Ultra'ни энг яхши Samsung смартфонларидан бирига айлантирди.

Сотиб олиш учун сабаблар: юқори сифатли дисплей, симсиз DeX функцияси, чиройли дизайн, такомиллашган камера функциялари, юқори аккумулятор автономлиги.

ЎҚИНГ: Дроп-тест видеоси: Galaxy Note 20 Ultra мустаҳкамроқми ёки iPhone 11 Pro Max?

Энг яхши ихчам смартфон: Galaxy S20 FE

Samsung ўтган йили янги Fan Edition сериясини тақдим этди. S20 FE бу - флагман S20 сериясининг кўплаб техник жиҳатларини ўзида мужассамлаштирган, бироқ нисбатан арзон ҳамда ихчамроқ бўлган смартфон.

Унга S20 сериясида бўлган Exynos 990/Snapdragon 865 чиплари ўрнатилган. Қурилма 4,500 мАс сиғимли аккумулятор эга. Дисплей ҳақида сўз юритадиган бўлсак, смартфон 120Hz экран янгиланиш частотасини қўллаб-қувватловчи 6.5 дюймли Super AMOLED дисплейи билан жиҳозланган. Унда, шунингдек, учта камера бўлиб, улар 12МП асосий камера, 12МП ультракенг камера, 8МП 3х зумни қўллаб-қувватловчи телефото камералардан иборат.

Samsung ушбу смартфонни уч йиллик Android янгиланиши билан таъминлашга ваъда беради. Шундай ажойиб имконият ҳамда техник жиҳатларга эга бўлган смартфоннинг нархи 699 долларни ташкил қилади.

Samsung компаниясининг Galaxy S20 FE смартфонини тақдим этиши унга флагманларга яқин бўлган смартфонлар сегментида бошқа компаниялар билан рақобатлашиш имконини берди.

Сотиб олиш учун сабаблар: ажойиб дизайн, юқори унумдорлик, ясси AMOLED дисплей, уч йиллик тизим янгиланиши.

ЎҚИНГ: Samsung Galaxy S20 FE'нинг тўлиқ техник жиҳатлари ва қадоқ таркиби билан танишамиз

Энг яхши букламафон: Galaxy Z Fold3

Galaxy Z Fold3 - Samsung'нинг янги букламафони. Ташқи кўринишидан у аввалги авлод Z Fold2'га ўхшаса-да, компания янги қурилмада кўплаб янги имкониятларни яратган.

Смартфоннинг ҳам ташқи, ҳам ички дисплейи 120Hz экран янгиланиш частотасини қўллаб-қувватлайди. Экран ёрқинлиги олдинги моделникига қараганда 29%, дисплей мустаҳкамлиги эса 80% га ошган. Ушбу қурилма S Pen'ни қўллаб-қувватловчи биринчи Galaxy букламафони бўлди.

Бундан ташқари, қурилманинг янги букланувчи механизмининг мустаҳкамлиги жуда яхши даражада. Смартфонда IPX8 стандарти бўлиб, у қурилмани сувдан ҳимоялайди. Z Fold3 букламафони Snapdragon 888 чипида ишлайди. Унинг 12/256ГБ, 12/512ГБ хотира турли версиялари мавжуд.

Сотиб олиш учун сабаблар: IPX8 стандарти, S Pen'ни қўллаб-қувватлаши, юқори унумдорлик.

ЎҚИНГ: Samsung Galaxy Z Fold3 5G'нинг техник жиҳатлари ҳамда қадоқ таркиби билан танишамиз

Энг яхши ўрта тоифадаги смартфон: Galaxy A52

Бу йил Samsung компанияси бир қанча ўрта тоифага кирувчи смартфонларни тақдим этди. Уларнинг орасида эса энг оммабопи бу - Galaxy A52. Қурилма 6.5 дюймли Super AMOLED дисплейига эга бўлиб, ушбу дисплей 90Hz экран янгиланиш частотасини қўллаб-қувватлайди. A52'нинг 5G талқини эса 120Hz частотада ишлайди.

Смартфон Snapdragon 720G чипи билан жиҳозланган бўлиб, энг юқори хотира тури 8/256ГБ ни ташкил қилади. Galaxy A51'га қараганда унинг камера сифати анча яхшиланган. Қурилма оптик барқарорликка эга бўлган 64МП асосий камера, 12МП ультракенг, 5МП макро, 5МП сатҳ камералар билан жиҳозланган. Аккумулятор ҳажми 4,500 мАс бўлиб, уни 25 ваттда қувватлаш мумкин. Қурилмада 3.5мм аудио жекнинг борлиги ҳам қувонарли ҳолат.

Сотиб олиш учун сабаблар: замонавий дизайн, такомиллашган камералар, 90Hz Super AMOLED дисплейи, 3.5мм аудио жек.

ЎҚИНГ: Galaxy A52'нинг техник жиҳатлари ва қадоқ таркиби билан танишамиз

Энг яхши бюджет синфидаги смартфон: Galaxy А32

Galaxy А32 бюджет синфидаги энг яхши смартфонлардан бири. Қурилма 6.4 дюймли Super AMOLED дисплейи, MediaTek Helio G80 чипи, 4/6/8ГБ тезкор хотира, 64/128ГБ доимий хотира, 5,000 мАс аккумуляторга эга. Смартфон чипининг унумдорлиги унчлик юқори эмас. Шунинг учун, қурилма юқори графикадаги илова ва ўйинларни очишда қийналади.

Сотиб олиш учун сабаблар: AMOLED дисплейи, янгича дизайн, 5,000 мАс аккумулятор.

ЎҚИНГ: Samsung Galaxy A32 5G'нинг техник жиҳатлари ва қадоқ таркиби билан танишамиз

Samsung барча синфга кирувчи смартфонларни тақдим этади. Ҳозирда S21 Ultra қурилмаси Galaxy смартфонларининг энг кучлиги, Note 20 Ultra эса ўз навбатида стилусга эга бўлган Note сериясидаги смартфонлар орасида энг яхшиси ҳисобланади.

Galaxy Z Fold3'га рақобат қилиши мумкин бўлган букламафон ҳозирда мавжуд эмас. Galaxy S20 FE сотувга чиққанига бир йил бўлди, бироқ унинг техник жиҳатлари флагман смартфонлардан ҳеч ҳам қолишмайди, шунингдек, флагманларга нисбатан ушбу смартфоннинг нархи нисбатан арзонроқ.

Икки йил аввал сотувга чиқарилган A50 қурилмаси дунё миқиёсида энг оммабоп смартфонлардан бири бўлган эди. Бир йил ўтиб компания A51 смартфонини тақдим этди. Ушбу смартфоннинг ҳам бозори анча чаққон бўлди.

Бу йил эса Galaxy A52 тақдим этилди. Аввалги икки авлодга қараганда, смартфон дизайни анча ўзгарди, шунингдек, техник кўрсаткичлар ҳам яхшиланди. A52'ни ўрта тоифадаги Galaxy қурилмалари орасида нархига арзидиган энг яхши смартфон дейиш мумкин.

Бюджет синфидаги А32 эса сифатли дисплей ҳамда катта ҳажмли аккумуляторга эга. У ҳам ҳозирда энг яхши бюджет синфидаги смартфон ҳисобланади.

ЎҚИНГ: Samsung ҳақида сиз билган ва билмаган фактлар!

Сайт янгиликларидан доимий хабардор бўлиш учун Телеграм каналимизга қўшилинг!