Барча Android-қурилмалар учун Telegram X иловасида йирик янгиланиш!
Telegram дастурчилари мессенжернинг экспериментал талқини – Telegram X клиенти учун узоқ кутилган янгиланишни чиқаришди. 0.21.7.1151 рақамли ушбу апдейтни Android-қурилмалар эгалари ўрнатиб олишлари мумкин.
ЎҚИНГ: YouTube’нинг пулли функциясидан Telegram орқали бепул ва рекламасиз фойдаланса бўлар экан!
Шундай қилиб, Telegram X иловасининг 0.21.7.1151 версиясида қуйидаги янги имкониятлар тақдим этилган:
- Билдиришномалар 2.0 – улар нолдан бошлаб қайтадан яратилган бўлиб, ишончлилик яхшиланган ва фаол фойдаланувчилар учун такомиллаштирилган созламаларни ўз ичига олади.
- Мультиаккаунт 2.0 – тизим ресурсларини кам сарфлаган ҳолда чексиз миқдорда аккаунтлар қўшиш мумкин.
- Чатларни уларнинг турига қараб (махфий ёзишмалар, гуруҳлар, каналлар, ўқилмаганлар) саралаш имкони бор.
- Махфий чатларда исталган хабарни барча учун ўчириш мумкин (вақти ҳам чекланмаган – аввал 48 соатгача эди). Фойдаланувчилар нафақат ўзларининг, балки суҳбатдошларининг ҳам ёзганларини ўчира оладилар.
- Мессенжернинг ўзида сўровлар жойлаш йўлга қўйилган.
- Оддий гуруҳларда ва «Танланганлар» («Избранные»)да бирор хабарни тепага бириктириб қўйиш мумкин.
- Мессенжернинг расмий таржима платформаси – translations.telegram.org орқали яратилган локализацияларни қўллаш ва уларга ҳавола орқали ўтиш мумкин.
- «Тармоқ ва маълумот алмашиш» («Сеть и данные») бўлимида созламаларнинг ташқи кўриниши озроқ ўзгартирилган.
- Блокни четлаб ўтиш воситалари яхшиланган.
- Икки босқичли авторизация учун почтани янгича тасдиқлаш йўлга қўйилган.
- Махфий канал ёки чатдаги бирор постга элтувчи ҳаволани нусхалаб олиш мумкин.
- Гуруҳ аъзоларидан нечтаси айни дамда онлайн эканлиги тўғри ифодаланадиган бўлган.
- Мессенжернинг libtgvoip (2.4.4) ҳамда TDLib (1.4.0) кутубхоналари янгиланган.
Айтиш керакки, Telegram X фойдаланувчиларининг 50 фоизи учунгина ушбу апдейт тарқатилмоқда. Агарда сизда бу илова янгиланмаётган бўлса, мана бу ҳавола орқали бета-тест дастурига қўшилиб, янги талқинини олишингиз мумкин.
ЎҚИНГ: Telegram’даги хатолик сабабли ўчириб юборилган хабарни тиклаш йўли топилди!