Яна бир машхур мессенжерга ҳам "Story" қўшилмоқда

Яна бир машхур мессенжерга ҳам

Кўпинча Telegram'дан ҳам кучлироқ ҳимояга эга эканлиги билан таърифланадиган Signal мессенжер ҳам эндиликда ўз иловасига Story функциясини қўшмоқда. Худди Instagram'да бўлганидек, Signal'нинг ҳам Story хусусияти сизга 24 соатдан кейин автоматик равишда йўқ бўлиб кетадиган суратлар, видеолар ва матнларни дўстларингиз билан улашиш имконини беради.

Signal, Signal бўлмайди, агар ушбу функция ҳам шифрланган бўлмаса – Android учун илованинг бош дастурчиси, Грейсон Паррелли, Story'лар ҳам тўлиқ шифрланган бўлишини ва уларни кимлар кўра олишини маълум қилди:

"Сиз Story'ларингизни барча Signal суҳбатдошларингиз (Signal суҳбатдошлари = контактларингиз + сиз 1:1 чатда бўлган ҳар бир киши) ёки махсус дўстларингиз рўйхати ёки Signal гуруҳларингиз билан улашишингиз мумкин. Story'ни гуруҳлар билан улашганда, ўша гуруҳдаги ҳар ким Story'ни кўриши, уни бошқаларга улашиши, унга реакция билдириши ва жавоб бериши мумкин."

Қизиғи шундаки, агар Story'ларни ёқтирмасангиз уларни созламалар орқали тўлиқ ўчириб қўйишингиз мумкин ва шунда сиз ҳеч қандай Story ярата олмайсиз ва бошқаларнинг Story'ларини ҳам кўролмайсиз.

Ҳозирда ушбу функция синовдан ўтказилмоқда ва фақатгина бета иштирокчиларигина Story'лар яратиши, бошқа бета иштирокчиларининг Story'сини кўриши мумкин холос.

Маълумот учун, Story хусусиятини илк марта 2013 йилда Snapchat тақдим қилган бўлса, ундан кейин Twitter, Instagram, WhatsApp, Facebook Messenger, YouTube, TikTok ва эндиликда Signal ҳам уни кўчириб олишган.

ЎҚИНГ: Россияда чет эл ижтимоий тармоқлари блокланганидан бери Telegram "бир қоп семирди" 

Хабарларни тез ва осон ўқиш учун Андроид иловамизни сақлаб олинг.