eSIM даври бошланмасидан аввал тугамоқда – iSIM билан танишинг!

eSIM даври бошланмасидан аввал тугамоқда – iSIM билан танишинг!

Одамлар эндигина нано SIM-карталардан eSIM'га ўтишни бошлаган бир вақтда, eSIM'дан ҳам яхшироқ технология, iSIM тақдим этилди. Qualcomm ва Thales томонидан таклиф қилинаётган янги технология смартфонларнинг янада ихчам бўлишини таъминлайди ва яхшиланган қувват самарадорлигини таклиф қилади.

"Qualcomm Technologies ва Thales томонидан олиб борилган бир неча йиллик қизғин ишланмалардан сўнг iSIM учун GSMA томонидан дунёдаги илк хавфсизлик сертификати берилди. Борган сари оммалашиб бораётган eSIM билан бир қаторда, Thales'нинг 5G iSIM технологияси қурилма ишлаб чиқарувчилари ва уяли алоқа операторлари ўз мижозларига "ҳаво орқали уланиш" билан бирга янада ажойиб ва қулайроқ маҳсулот дизайнларини таклиф қилишлари учун янада кўпроқ эркинлик беради", – дейди Гуиллауме Лафаих, Thales Mobile компаниясининг вице-президенти.

iSIM билан жиҳозланган Snapdragon 8 Gen 2 чипсети GSMA хавфсизлик сертификатига эга бўлиши, у eSIM модуллари билан бир хил кибер ҳимоя даражасига эга эканлигини англатади. iSIM технологияси чипсетда 1 мм² дан кам жой эгаллайди. Бу ҳозирги нано SIM-карта (12,3 х 8,8 мм) ҳажмидан 100 баравар кичикроқдир.

iSIM'нинг асосий афзаллиги шундаки, у қурилмалар ичида SIM-карта хизматлари учун алоҳида жисмоний майдонга эҳтиёжни йўқ қилади ва камроқ қувват сарфлайди. 2027 йилгача дунё бўйлаб iSIM билан жиҳозланган қурилмалар сони 300 миллиондан ортиши кутилмоқда.