Galaxy A72 5G'нинг рендерлари чиқди, яна иккита Galaxy смартфони ҳақида маълумот пайдо бўлди
Ўтган ҳафта Samsung Galaxy A52 5G смартфонининг кўринишидан расмий рендерлари пайдо бўлганди, эндиги навбат Galaxy A72 5G смартфонига келди.
Номидан ҳам кўриниб турганидек, ушбу қурилма Galaxy A71 5G'нинг давомчиси ҳисобланади. A72 5G'нинг дизайни Galaxy A52 5G'ники билан деярли бир хил. Аслида, A72'ни A52'нинг ҳажман каттароқ «ака»си деса бўлади.
ЎҚИНГ: Galaxy A72 илк суратларда: у кутилганидек эмас экан!
Сиздирилаётган маълумотлар оқимидан келиб чиқиб, Galaxy A72 5G қурилмаси 2021 йил бошларида тақдим қилинишини кутиш мумкин. Смартфон орқа панели пластикдан, ромлари эса алюминийдан бўлиши айтилмоқда. 6.7 дюйм диагоналга эга ясси экраннинг юқори марказида айланасимон камера кемтиги бўлади.
Орқа камералар сони тўртта, лекин, афсуски, улар ҳақида тафсилотлар мавжуд эмас. Бироқ асосий камера 64МП бўлиши мумкин.
Galaxy A72 5G смартфони 165 х 77.4 х 8.1 мм (камера бўртмаси билан 9.9 мм) ўлчамга эга бўлади. Қурилмада 3.5 мм аудио жек ва экраности бармоқ изи сканери ҳам мавжуд. Смартфоннинг қулфдан чиқарилган версияси АҚШда 599 доллардан бошлаб сотилиши кутилмоқда.
ЎҚИНГ: Samsung Galaxy M51'нинг техник жиҳатлари ва қадоқ таркиби билан танишинг
A72 5G'нинг рендерлари пайдо бўлган бир пайтда, Galaxy A32 5G смартфони FCC сертификатига эга бўлди.
Samsung'нинг яқинда тақдим этилиши кутилаётган Galaxy A32 5G смартфони компаниянинг энг арзон 5G қурилмасига айланади. A32 5G'нинг рендерлари аллақачон сизидирилган. Энди, қурилма FCC сертификатини олди. Бу билан унинг техник жиҳатлари ҳам аён бўлди.
Galaxy A32 5G смартфони қадоғида 15 Вт лик қувватлагич бўлади. FCC сертификатини олган қурилма модели SM-A326J бўлиб, у 5G'нинг 28/77/7 диапозонларини қўллаб-қувватлайди. NFC мавжуд эмас.
Galaxy A32 5G 6.5 дюйм диагоналга эга, томчисимон кемтикли экран билан жиҳозланади. Орқа панель эса ялтироқ сайқалли пластикдан ишланган бўлади. Қурилма учта орқа камера билан жиҳозланади. Асосий камера резолюцияси эса 48МП.
Смартфон ўлчамлари 164.2 х 76.1 х 9.1 мм бўлиб, бармоқ изи сканери қувват тугмасига ўрнатилади. A32 5G қадоқдан Android 11 операцион тизимида ишлаши эҳтимоли йўқ эмас.
ЎҚИНГ: Samsung флагманларини ижарага олинг
Samsung'нинг яна бир ҳамёнбоп смартфони ҳақида ҳам маълумотлар пайдо бўлди. Galaxy A02 смартфони Geekbench'да синовдан ўтди.
Samsung яқинда Galaxy A02s смартфонини тақдим қилганди. Эндиги миш-мишларга қараганда, компания Galaxy A02 номли моделни ҳам тақдим қилиш арафасида турибди.
Geekbench эталон тестида синовдан ўтган SM-A022F модель рақамига эга смартфон айнан Galaxy A02 ҳисобланади.
Бенчмарк синови натижалар ойнасида кўрсатилишича, қурилма тўрт ядроли MediaTek MT6739WW чипида ишлайди. Ушбу чип 2017 йил чиқарилган бўлиб, Snapdragon 450'дан қуйироқ модель ҳисобланади.
Galaxy A02'нинг тезкор хотираси 2ГБдан бошланиши кўрсатилган. Қиёс учун, A02s'да оператив хотира 3ГБдан бошланади. A02 қадоқдан Android 10 тизимида ишлайди.
