Galaxy Note 7 кутилганидан 5 доллар қимматроққа сотилмоқда

Galaxy Note 7 кутилганидан 5 доллар қимматроққа сотилмоқда

Samsung ўтаётган ҳафтада ўзининг қайта тикланган Galaxy Note 7 фаблетини Жанубий Корея смартфон бозорида сотувга чиқарди. Телефон аппаратининг 64 ГБ доимий хотирали талқини $625 доллардан сотилмоқда, яъни янги iPhone 7’дан 25 долларга арзон. Девайснинг $620 доллардан сотилиши тахмин қилинган эди.

Инсайдерларнинг қайта тикланган Galaxy Note 7 моделининг “Galaxy Note 7R” деб аталиши тўғрисидаги хабарлари ўз исботини топмади. Ундан сўнг бу талқин FE (Fandom Edition), яъни “чинакам мухлислар талқини” сифатида номланиши ҳақида хабарлар ҳақиқатга яқинроқ бўлиб чиқди.

Samsung Galaxy Note FE’нинг ҳозирча доимий хотираси 64 ГБ бўлган версияси бозорга чиқарилган. Смартфон Android 7.0 бошқарувида ишлайди.

Унинг аккумулятор сиғими 3200 мА•соатгача камайтирилган. Бошқа жиҳатлари асл Galaxy Note 7’ники билан бир хил: IP68 сертификатига эга жаҳондаги «Note» туркумига кирувчи илк фаблет 5.7 дюймли улкан ва нафис экранга эга. Super AMOLED платформасида ишлайдиган экраннинг ҳар икки томони «edge» туркумидаги гаджетлар каби ён томонга букилган. Экран QHD (ҳар дюймда 518 пиксель).
Бош камера 12 МП ва унинг объективида ҳам Galaxy S7 смартфонлари каби қўш-пикселли технология татбиқ этилган. У суратни оптик барқарорлаштириш тизимига эга. Бу камерада 2160p (4K) сиғимли видео ёзиш мумкин.

Note7’га 8 ядроли Exynos 8 ёки Snapdragon 820 процессори, 256 ГБ.гача флешкани ўқийдиган microSD хотирани кенгайтириш бўлмачаси ўрнатилган.

Эслатиб ўтамиз, аккумулятор билан носозлик оқибатида келиб чиқаётган ёнғинлар сабаб Samsung жаҳон бўйлаб 2,5 млн дона Galaxy Note 7 смартфонини ортга чақириб олган эди.