Galaxy Note10'нинг ҳамёнбоп талқини Note10 Lite деб аталади. Бу ҳали ҳаммаси эмас!..
Куни кеча Galaxy Note10'нинг ҳамёнбоп талқини чиқаётгани ҳақида хабар бериб ўтган эдик.
Аслини олиб қараганда, Galaxy Note10 линейкасида арзон смартфон ҳам бўлиши ҳақидаги миш-мишлар августдаги тақдимотдан олдин тарқалган эди. Ваҳоланки, Samsung фақатгина иккита қурилмани тақдим қилганидан сўнг, кўпчилик ҳамёнбоп Note10 бўлмас экан-да, деган хулосага келган эди.
Бироқ "Шамол бўлмаса, дарахтнинг учи қимирламайди", деганларидек, миш-мишлар тўғри бўлиб чиқди. Ишончли манбанинг маълум қилишича, ростдан ҳам ҳамёнбоп Note10 чиқади ва Samsung унга Galaxy Note10 Lite деб ном берди. Девайснинг модель рақами SM-N770F эканлиги аллақачон тасдиқланган бўлса-да, унинг техник жиҳатлари ҳақида ҳеч қандай маълумот йўқ. Lite версия нимаси билан Lite бўлишини билмасак-да, смартфонда S-Pen бўлишига кафолат бор. Ҳар ҳолда, у ҳам Note оиласи аъзоси.
Бу ҳали ҳаммаси эмас...
Note10 Lite ҳақида хабар тарқатган манба Galaxy S10 Lite устида ҳам ишланаётганини айтмоқда. Хайриятки, бу смартфон ҳақида маълумот бор. Хайриятки, бу маълумотлар кишини хурсанд қилади!
Аккумулятор сиғими 4 500 мА/соат бўлган S10 Lite смартфони 45 ваттли тезкор қувватлаш технологиясига эга бўлиб, худди Galaxy A91 каби Snapdragon 855 чипида ишлайди. Хотираси 8/128ГБ бўлади. Орқа камера модули 48 мегапикселли асосий, 12 мегапикселли ўта кенг бурчакли ва 5 мегапикселли сатҳ камераларидан тузилган бўлса, селфи камера 32 мегапикселли бўлади. Дисплей сифатида эса 6,7 дюйм диагоналли Full HD+ резолюциясидаги панель ўрнатилади.
Мана, маълумотлар билан ҳам танишиб чиқдик. Қизиғи, смартфоннинг техник жиҳатлари S10'ники билан деярли бир хил (камередан ташқари), ҳатто ундан яхшироқ. Лекин нега у Lite деб аталмоқда? Мана шу бизни қизиқтирмоқда. Балким, ишончли манба бу сафар адашгандир...
Демак, хурсанд бўлишга ҳозирча эрта! Янада кўпроқ маълумотлар ошкор бўлишини кутамиз.
ЎҚИНГ: Шошилинг! Galaxy Note10+ ни 500 доллар арзонроққа сотиб олсангиз бўлади!
