Google бошланғич синф смартфонлари учун Android 13 Go версиясини тақдим қилди

Google компанияси ўта бюджет смартфонлар учун Android 13'нинг Go версиясини тақдим қилди. Android операцион тизимининг ушбу кичрайтирилган версияси илк маротаба беш йил аввал кам оператив ва доимий хотирали смартфонлар учун чиқарилган эди ва эндиликда компаниянинг маълум қилишича, у билан ишлайдиган ойлик актив қурилмалар сони бугунги кунда 250 миллиондан ошган.

Маълум бўлишича, Android 13 Go билан дастурий таъминот янгиланишлари Google Play System Updates билан қабул қилинадиган бўлади. Бу билан эса кам хотирали бюджет смартфонлари ҳам катта Android янгиланишини кутиб ўтирмай, муҳим янгиланишларни қабул қилиб, доимо янгиланган ҳолатда бўлишига ишонч ҳосил қилиш мумкин бўлади.

Шунингдек, янги версия фойдаланувчиларга биринчи марта Material You созламалари билан фон расмига мос равишда динамик ранглар яратиш функциясидан фойдаланиш имконини беради. Бироқ, тўлиқ Android версиясида бўлганидан фарқли ўлароқ Android 13 Go танлаш учун (16 та эмас) фақатгина тўртта ранглар схемаси билан чекланган.

Компаниянинг қўшимча қилишича, бош менюдан экранни ўнгга суриш "Discover" лентасига олиб ўтади ва бу фойдаланувчилар ўзлари танланган мавзуларда мақолалар ва бошқа контентлар кўриш имконини беради. Қолаверса, Go версия Android 13'нинг Билдиришнома рухсатномалари, Илова тили созламалари каби эътиборли функцияларни ҳам ўз ичига олади.

Android 13 билан ишлайдиган қурилмалар 2023 йилда чиқарилиши айтилмоқда. Таъкидлаш жоизки, янги Go версия учун қурилма талаблари оширилган: (аввалгидек 1 эмас) 2ГБ оператив ва 16ГБ доимий хотира талаб қилинади.

ЎҚИНГ: Android 13 билан қутидан чиқадиган илк Galaxy қайси эканлиги маълум бўлди