Google ва ниҳоят Android'га iPhone'нинг энг зўр хусусиятини тақдим этади
Бир неча йиллардан буён iPhone ва Android'лар ўртасидаги тафовут торайиб бормоқда. Бироқ бир жиҳат борки, унда iPhone'лар Android қурилмаларни ер тишлатади. Бу ҳам бўлса дастур янгиланиши.
ЎҚИНГ: Google Pixel 6 ва 6 Pro'нинг тўлиқ техник кўрсаткичлари сиздирилди
Apple ўзининг iPhone'ларини беш йил давомида қўллаб-қувватлайди. Мана, масалан, бу йил чиқажак iOS 15'ни олайлик. Мазкур тизим 2015 йилда чиққан iPhone'ларга ҳам жўнатилади. Бу, албатта, мақташга арзийди.
Худди шундай, ўзининг янги Pixel 6 смартфонлари билан Google ҳам фойдаланувчига айни амалиётни тақдим этишни режалаштираётган кўринади.
Jon Prosser'нинг Twitter'да қолдирган постидаги 50МП камера, 12ГБ RAM ёки 5,000 мАс аккумулятор эмас, балки беш йиллик дастур янгиланиши кўпчилик учун энг қувонарли янгилик бўлган бўлиши аниқ.
«Менга айтишларича, Google ҳар икки қурилма [Pixel 6 ва Pixel 6 Pro] ни камида 5 йил дастур янгиланиши билан таъминлашга қарор қилган. Бу ЗЎР ЯНГИЛИК, айниқса, агар бу телефонларни олмоқчи бўлсангиз», дейди Prosser.
Таъкидлаш керакки, қурилмалар ишлаш муддати ва оптимал Android амалиёти борасида Google'нинг Pixel линейкаси мижоз олдида ҳар доим энг яхши танлов бўлган.
Ушбу янгиликнинг яна бир ижобий томони шуки, қурилмани кўпроқ муддат қўллаб-қувватлаш билан компаниялар электрон чиқиндилар камайишига улкан ҳисса қўшади. Яна хабар берилишича, Google энди XL моделидаги смартфонлар чиқармайди. Бу ҳам iPhone мухлисларига таниш ҳолат.
ЎҚИНГ: Энг арзонидан энг зўригача: Android-смартфонларнинг бешта рейтинги (AnTuTu, 2021 йил июнь)
