HP Sprocket фото-принтери смартфондан олинган расмларни бир зумда чоп этади

Сир эмас, бугунги кунда рақамли тасвирлар жуда кенг оммалашган. Бироқ қоғозда чоп этилган суратлар ҳам ҳали ўз аҳамиятини йўқотган эмас. Ушбу омилларни ҳисобга олган ҳолда, HP компанияси HP Sprocket номли ихчам, қулай фото-принтерни намойиш қилди. Митти-принтер шу даражада ихчамки, уни чўнтакда олиб юриш мумкин. Энг қизиғи, фото-принтер тонерини ҳам алмаштириш, профилактика қилиш ҳам талаб этилмайди.

Митти принтер сиёҳ қоғозни ўзида сақланадиган ZINK Zero Ink технологиясидан фойдаланиб, расмларни чоп этади. Принтердан чиқарилган расм қоғозининг орқа тарафидаги плёнка олиб ташлангач, суратни исталган жойга стикер қилиб ёпиштириш мумкин.

Фото-принтер билан мобил қурилма (ноутбук, планшет, телефон) Bluetooth орқали бир-бирига уланади. HP Sprocket иловаси орқали расмларни чоп этишдан олдин уларни таҳрирлаш ҳам мумкин. Расмлар принтердан 2 Х 3 форматда чиқарилади.

HP Sprocket 130 доллар нархида сотувга чиқарилган. ZINK фотоқоғозини (тўпламда 10 дона) алоҳида, 10 доллар эвазига сотиб олиш мумкин.