Huawei ҳам қўл қовуштириб ўтиргани йўқ — Америкага қарши уруш эълон қилди

Huawei ҳам қўл қовуштириб ўтиргани йўқ — Америкага қарши уруш эълон қилди

The New York Times нашрининг хабар беришича, Хитойнинг электроника маҳсулотлари ва телекоммуникация қурилмалари ишлаб чиқарувчи Huawei компанияси АҚШ Федерал Коммуникация Комиссияси (FCC) ни судга берди.

Хабарда айтилишича, компания АҚШ Аппеляция судининг Бешинчи округига ўз даъво аризасини топширган.

Аризада FCC томонидан яқинда чиқарилган қарор юзасидан шикоят қилинган. Агентлик чиқарган қарорда Американинг чекка ҳудудларидаги мобил операторларнинг Huawei ва ZTE'дан техника воситалари сотиб олиш мақсадида федерал субсидиядан фойдаланишига чек қўйилган. FCC'дагилар бир овоздан бу икки компанияни миллий хавфсизликка рахна, деб баҳоламоқда.ОАВ учун ўтказилган конференцияда Huawei Бош юристи Сонг Люпин компания аризаси борасида қуйидагиларни айтди: 

“Қўшма Штатлар сиёсатчилари киберхавфсизлик борасида қаттиқ хавотирда эканликларини таъкидламоқда. [Бироқ] ўз фаолиятини Хитойда бошлагани учун Huawei каби компанияларга чеклов қўйиш ҳеч қандай киберхавфсизлик муаммоларини ҳал қилмайди.

Ушбу қарорни чиқарётганда FCC айбсизлигини исботлаш учун Huawei'га ҳеч қандай имкон бермасдан, бизнинг компаниямизга очиқчасига “миллий хавфсизликка рахна“ тамғасини босиб қўйди. FCC'нинг қарори Конституцияга қарши. Шунинг учун ҳам, қонуний йўл тутишдан бошқа имконимиз йўқ“.

Люпиннинг таъкидлашича, Huawei қарор натижасида чекка ҳудудлар аҳолисига етказилиши мумкин бўлган зарар ҳақида FCC'га 21 та батафсил шарҳ тақдим қилган.

Компания адвокати Глен Нагер эса қуйидагиларни қўшимча қилди:

“Алоқа тўғрисидаги федерал қонун Универсал хизмати қоидаларида АҚШ Алоқа федерал комиссиясига миллий хавфсизлик бўйича қарорлар чиқариш ёки миллий хавфсизлик бўйича қарорлар асосида Универсал хизмат жамғармаларини чеклаш ҳуқуқини берувчи бирор эслатма йўқ“.

FCC Раиси Ажит Паи конгресс эшитувида нутқ сўзлаб, агентликнинг Huawei ва ZTE'га қарши ҳаракатига изоҳ берди. Унинг айтишича, икки компания АҚШ коммуникация тармоқлари ва коммуникация тармоқ занжири хавфсизлигига рахна солади. “Huawei ва ZTE'нинг Америка хавфсизлиги ва 5G келажагига соладиган рахнаси олдида FCC қўл қовуштириб ўтирмайди“, дейди у.

ЎҚИНГ: Huawei нега куракда турмайдиган сўзлар билан Apple’ни ҳақоратлади?

Хабарларни тез ва осон ўқиш учун Андроид иловамизни сақлаб олинг.