Huawei ҳамёнбоп смартфон тақдим этди, совғасига – Huawei Band 4 Pro!
Хитойлик етакчи техно-компания аввалроқ Huawei Y6P ва Huawei Y5p смартфонларини, шунингдек, MatePad T8 планшетини тақдим этган эди. Энди бу телефонлар туркумининг навбатдаги вакили ҳам намойиш қилинди.
ЎҚИНГ: Huawei энг арзон 5G-смартфони намойишини расман эълон қилди!
Ўрта нарх тоифасига мансуб янги смартфон Huawei Y8p деб номланган ва Kirin 710F процессори базасига қурилган. Гаджет тезкор хотираси 4 ва 6 гигабайтлик вариантларда чиқади, доимий хотираси эса ҳар иккала ҳолатда ҳам 128 гигабайтлик. Шунингдек, унинг корпусида 256 ГБгача ҳажмли MicroSD-карта учун уяча ҳам кўзда тутилган.
Huawei Y8p диагоналига 6,3 дюймлик, аниқлиги 2400х1080 пикселлик OLED-дисплейга эга. Бармоқ изи датчиги ҳам экранга интеграция қилинган, унинг тепа қисмида эса 16 мегапикселлик олд камера учун кемтик мавжуд.
Смартфоннинг бош камераси эса 48, 8 ва 2 мегапикселлик сенсорларни ўз ичига олган.
Huawei ушбу смартфонини Android 10 операцион тизими базасидаги EMUI 10.1 график қобиғи билан чиқарган. Пайқаганингиздек, унда Google сервислари ҳам, Google Play дўкони ҳам йўқ – фойдаланувчилар керакли иловаларни AppGallery орқали юклаб олишлари мумкин.
Huawei Y8p аккумуляторининг ток сиғими 4000 мА/соатлик, у USB-C порти орқали 10 ваттлик тезкорликда қувватланади.
ЎҚИНГ: Расмий рўйхат: EMUI 10’гача янгиланувчи барча Huawei смартфонлари
Компания бу смартфонини 245 евродан бошланувчи нархларда сотмоқчи. Унинг очиқ савдолари 29 май санасидан бошланади, унгача олдиндан буюртма қилганларга эса Huawei Band 4 Pro смарт-браслети ҳам қўшиб берилади.
Дарвоқе, хитойлик техногигант компьютерлар бозорига Windows’нинг «кушанда»сини ҳам чиқаряпти. Шунингдек, ишлатилса ҳам нархини кўп йўқотмайдиган смартфонлар топ-ўнталигидаги нақ еттита ўринни айнан Huawei ва унинг Honor брендига мансуб моделлар банд этган.
ЎҚИНГ: Энг зўр ўнта ҳамёнбоп смартфон (AnTuTu глобал рейтинги, 2020 йил апрель)
