Илон Маск 3 мингдан ортиқ Twitter ходимларини ишдан бўшатди
Илон Маск ҳали Twitter'ни сотиб олмасидан аввал, агар миллиардер компанияга эгалик қилса унинг жуда кўплаб ходимларини ишдан бўшатиши ҳақида миш-мишлар тарқалган эди. Гарчи бу хабарлар кейинчалик рад этилган бўлса ҳам, бугунги келиб бу содир бўлмоқда ва ҳозирда компания ходимларининг ярми ишдан бўшатилганлиги айтилмоқда.
Кеча, жума куни кўплаб Twitter ходимлари уйқудан уйғонишлари билан ишдан бўшатилганликлари ҳақидаги янгиликдан хабар топишди. Маълум бўлишича, уларнинг Twitter электрон почталари, ҳамда, офисга кириш учун фойдаланиладиган электрон рухсатномалари ўчириб қўйилган.
Ишдан олинганларнинг аниқ сони маълум эмас, бироқ сўнгги янгиликларга кўра, Илон Маск Twitter'нинг барча 7500 ишчиларининг ярмини ёхуд 3 мингдан ортиғини ўз лавозимидан озод қилган. Миллиардер ушбу ҳолатга шундай изоҳ берган:
"Twitter ишчи кучининг қисқартирилишига келсак, афсуски, компания кунига 4 миллион доллардан кўпроқ йўқотаётган пайтда бошқа илож йўқ".
Ишдан олинган кўплаб ходимлар ўзларининг Twitter саҳифаларида #LoveWhereYouWorked, яъни "ишлаган жойингни сев" ҳештеги остида ўзларининг ишдан олинганликлари ҳақида бошқалар учун хайрлашув твитларини қолдиришган. Бироқ, ҳамма ҳам бунга шунчаки кўз юмиб кетмаган. Ишдан бўшатилган бир нечта ходимлар тегишли қонунларга кўра Twitter'ни судга беришган.
Эслатиб ўтиш жоизки, Илон Маск ижтимоий тармоқ компаниясини сотиб олиши билан энг биринчи бўлиб унинг раҳбарларини ишдан бўшатган эди.
