Интернетда Galaxy S23 учун ҳимоя кейслари пайдо бўлди
Galaxy S23 ҳақида кундан-кунга янги маълумотлар тарқатилмоқда. Биз ўтган ҳафтада Samsung'нинг янги авлод смартфонларининг ташқи кўриниши билан сифатли рендерларда танишган эдик. Эндиликда таниқли инсайдер, Ice Universe, ўзининг Twitter саҳифасида янги Galaxy'ларнинг бошланғич модели учун ҳимоя кейслари суратларини улашди.
Айтиш мумкинки, тасвирлар бундан аввалги рендерларда кўрсатилган дизайн ўзгаришини тасдиқлайди: Galaxy S23 орқа камералари уларни ўраб турадиган оролга эга эмас, камералар худди Galaxy S22 Ultra ва Galaxy А32'да бўлгани каби телефондан бўртиб чиқиб туради. Бироқ, камералар ўрни ўзгармаган. Улар олдингидек, смартфон орқа томонининг чап юқори бурчагига вертикал равишда бир қатор қилиб жойлаштирилган.
Бундан аввал Galaxy S23 (SМ-S9110) смартфони Galaxy S22'дан бироз каттароқ, 146.3х70.8х7.6 мм ўлчамда, 6.1 дюймли экран билан чиқарилиши маълум қилинган эди. Қўшимчасига, смартфон олд томонининг юқори марказидаги юмалоқ тирқишига 12МП эканлигини айтилаётган селфи камера ўрнатилган. Қурилма яқинда қабул 3C сертификати унинг 25 Вт тезликда зарядланишини ҳам ошкор қилган. Миш-мишларга кўра, янги Galaxy S смартфони Snapdragon 8 Gen 2 чипсети билан One UI 5 ўрнатилган ҳолда тақдим қилинади.
ЎҚИНГ: Эски Samsung смартфонлари батареясида жиддий муаммо кузатилмоқда
