iPhone SE (2020) тақдим қилинди
Apple 15 апрель куни ўзининг арзонроқ iPhone'ини ҳеч қандай йиғилиш ва тантанали маросимларсиз тақдим қилди.
Иккинчи авлод iPhone SE'си 2016 йилда тақдим қилинган iPhone SE билан бир хил номланган. Қурилма нархи 399 АҚШ доллари бўлиб, олдиндан буюртмалар жума кунидан бошланади, харидлар 24 апрелдан мижозларга етказиб берилади.
Ушбу смартфон Apple учун мураккаб бир вазиятда тақдим қилинди. Коронавирус сабаб Хитойдаги талабнинг кучсизлиги ҳамда таъминотнинг яхши эмаслиги сабаб февраль ойида компания иккинчи чоракдаги даромадлар пасайиши ҳақида маълум қилганди. Аммо купертиноликлар янги iPhone SE'га бўлган талаб борасида ўзларига ишонган кўринади.
Янги смартфоннинг ички аппарат таъминоти iPhone 11 ва iPhone 11 Pro'ники билан бир хил, аммо корпус дизайни 2017 йилги iPhone 8'никига ўхшаш. iPhone SE (2020) да Apple'дагилар iPhone 8 дизайнидан фойдаланган бўлса-да, девайснинг бошқа жиҳатлари, жумладан, экран ва процессорни такомиллаштирган. Натижада ўта қиммат iPhone смартфон сотиб олишни хоҳламайдиганлар учун ажойиб маҳсулот пайдо бўлган. Маълумот учун, iPhone 11 699 доллар, iPhone 11 Pro 999 доллардан бошлаб сотилади. Аппле янги iPhone SE борасида қўллаган стратегия, аслида, оригинал iPhone SE'да ҳам қўлланилган, яъни биринчи авлод iPhone SE дизайни iPhone 5'ники билан бир хил эди.
Айни дамда Apple'нинг аксарият дўконлари карантин сабаб ёпиқ бўлгани боис iPhone SE'ни харид қилишдан олдин ишлатиб кўриш имкони йўқ. Лекин бунга ҳожат ҳам йўқ, аслида. iPhone 8'ни кўрганмисиз? Бу худди 449 долларлик iPhone 8'га ўхшаган, фақат яхшироқ телефон. Дарвоқе, Apple энди iPhone 8'ни ишлаб чиқаришни тўхтатади.
iPhone 11'га қўйилган Apple A13 процессори iPhone SE'да ҳам ишлатилган. Бу эса иккинчи авлод iPhone SE'да биринчи авлодга қараганда портрет ва HDR'га эга яхшироқ камера ҳам бўлади, деганидир. HDR расмлардаги қоронғу ёки ўта ёрқин майдонларнинг аниқроқ чиқишини таъминлайди. Портрет режими эса (iPhone 8'да ҳам портрет режими бор эди) юзнинг четларини блур қилиш имконини беради.
iPhone 8'да бўлган ва янги iPhone SE'га ҳам ўрнатилган бошқа жиҳатларга симсиз қувватлаш, Touch ID'ли уй экрани тугмаси, сув ва чангга чидамлиликнинг IP67 даражаси киради. Янги хусусиятлар эса сониясига 60 та кадр олиш имконига эга 4K видео, видеоларда стерео овоз, стабиллаштирилган видео ва портрет режимига эга селфи камера ҳамда 18 ватт тезкор қувватлаш имконидан иборат. Аудио жек эса йўқ. Қулоқчиндан фойдаланиш учун махсус донгл (адаптер) дан фойдаланиш керак.
Базавий моделда доимий хотира сиғими 64ГБ бўлади. Аммо 449 долларга 128ГБлик талқинни, 549 долларга эса 256ГБлик iPhone SE харид қилишингиз мумкин.
Янги iPhone SE'ни сотиб олсангиз Apple TV+ хизматидан бир йил бепул фойдаланасиз.
ЎҚИНГ: «Жонли» тест видеоси: қайси iPhone қуввати энг кўпга етади?
