Сўз эркинлиги учун ижтимоий тармоқ сотиб олиш давом этади: навбат Кане Вестга

Сўз эркинлиги учун ижтимоий тармоқ сотиб олиш давом этади: навбат Кане Вестга

Америкалик таниқли репер, Кане Вест, Parler ижтимоий тармоғини сотиб олмоқда. Бу ҳақида Parler бош компанияси Parlement Technologies компанияси ўзининг пресс-релизида хабар берди.

"Parlement Technologies компанияси илгари Кане Вест номи билан танилган Ye учун Parler платформасини сотиб олиш бўйича принципиал келишувга эришганини мамнуният билан эълон қилади. Сотиб олиш Parler'га барча овозлар қабул қилинадиган бекор қилиб бўлмайдиган экотизимни яратишда келажакдаги ролини таъминлайди." дейилади хабарда.

"Ye сўз эркинлиги медиа майдонига янги қадам ташламоқда ва (энди у) ҳеч қачон ижтимоий тармоқлардан чиқариб юборилишдан қўрқмайди." дейди компания раҳбари Жорж Фармер.

Шунингдек, Кане "Консерватив фикрлар зиддиятли деб ҳисобланган дунёда биз ўзимизни эркин ифода этиш ҳуқуқига эга эканлигимизга ишонч ҳосил қилишимиз керак", дейди матбуот баёнотида.

Таъкидлаш жоизки, бир ҳафтача аввал Кане ўзининг антисемитик изоҳлари сабаб олдин Instagram'дан, кейин эса Twitter'дан чиқариб юборилган эди.

Twitter алтернативи — Parler платформаси ўзининг "бекор қилиб бўлмайдиган" сўз эркинлиги сабаб бир неча марта муаммоларга ҳам дуч келган. Ижтимоий тармоқ 2021 йил 6 январда бўлиб ўтган Капитолий биносига бостириб киришни режалаштириш ва мувофиқлаштиришда ёрдам берганликда айбланган ва у Apple Store ва Google Play Store'дан олиб ташланган. Кейинчалик ўз платформасидаги постларни модерация қилишга рози бўлгач, Parler иккала иловалар дўконларига ҳам қайтган.

Кане гигант ижтимоий тармоқлардан "ҳайдалган" ва уларга жавобан ўз ижтимоий тармоғини яратаётган ягона таниқли шахс эмас. Ўтган йилнинг бошида АҚШнинг собиқ президентларидан бири, Доналд Трумп ҳам Twitter ва бошқа ижтимоий тармоқлар бан қилинган эди. Шундан кейин жорий йилнинг феврал ойида у ўзининг Truth Social деб номланган ижтимоий тармоғини яратди ва уни аввал Apple Store'га, яқинда эса Google Play Store'га ҳам чиқарди. 

Қолаверса, дунёдаги энг бой одам, Tesla ва SpaceX компаниялари раҳбари Илон Маск ҳам Twitter'ни "сўз эркинлиги" учун ҳали ҳам сотиб олиш жараёнида.

Parler ва Кане Вест ўртасидаги келишув йил охирида ёпилиши кутилмоқда.

ЎҚИНГ: Илон Маск ахийри Twitter'ни сотиб олишини айтди

Terabayt.uz сайтининг видеолари: Youtube'даги каналимизда!