Mi Band 5 намойиш этилди: Xiaomi’нинг идеал смарт-браслетини «жонли» видеода кўрамиз!

  •   DiMaX
  •  1359
  •  11.06.2020 15:48

Mi Band 5 намойиш этилди: Xiaomi’нинг идеал смарт-браслетини «жонли» видеода кўрамиз!

2019 йилнинг ёзидан бери кутилаётган Xiaomi Mi Band 5 ақлли билагузуги Хитойда бугун – 11 июнда тақдим этилди. Бошқа турдошларида мавжуд бўлган ноқулайлик ва камчиликлар бунисида бартараф этилган ва натижада идеал фитнес-браслетга айланган.

ЎҚИНГ: Mi Band 5’нинг бошқалардан фарқли 7 жиҳати ва янги расмлари

Одатда фитнес-трекерларни қувватлаш учун унинг капсуласини тасмачадан олиб, зарядчикка улаш керак бўлар эди. Xiaomi Mi Band 5 моделида эса бунақа ноқулайлик йўқ – магнитли қувватлагични шундоққина корпус остидан «ёпиштириб» қўйиш кифоя!

 

Mi Band 5 тасвир аниқлиги 126х294 пикселлик, ўлчами эса диагоналига 1,1 дюймлик AMOLED экран билан жиҳозланган; бу эса Mi Band 4 моделидагидан 20 фоизга катта. Янги ақлли трекер юздан ошиқ анимацияли циферблатларга эга, уларда турли мультфильмлар ва анимелар қаҳрамонлари акс этган.

Ишлаб чиқарувчига кўра, Mi Band 5 билагузугида фойдаланувчининг фаоллигини янада аниқ ва тезкор аниқлаш учун яхшиланган процессор қўллашган. Унда спортнинг 11 туридаги фаолликни кузатишдан ташқари, аёллар учун ҳайз даврийлигини назорат қилиб бориш функцияси ҳам бор.

ЎҚИНГ: Xiaomi бирйўла иккита – Mi Band 5 ҳамда Mi Band 4C фитнес-билагузукларини чиқаряпти

Xiaomi Mi Band 5 моделида уйқуни назорат қилиш функцияси яхшиланган, атмосфера босимини мониторинг қилувчи тизим – барометр ҳамда смартфон камерасини масофадан бошқариш функцияси ҳам қўшилган. Юрак ритмини узлуксиз тарзда мониторинг қилиб туриш учун BioTracker PPG датчиги ўрнатилган. Юрак ритми асосида жисмоний фаолликни ўлчовчи ва керакли тавсиялар берувчи PAI (Personal Activity Intelligence) индексини қўллаб-қувватлайди.

Янги смарт-билагузук аккумуляторининг ток сиғими 125 мАсоатни ташкил этади ва бунинг эвазига қурилма битта қувват билан 14 кундан 20 кунгача ишлай олади. Mi Band 5 корпусининг сувдан ҳимояси аввалги даражасида – 5ATM ҳолида қолган. Девайс замонавий Bluetooth 5.0 модули билан таъминланган, унинг битта версияси NFC чипига ҳамда Xiao AI овозли ёрдамчисига ҳам эга.

Қуйидаги «жонли» видеода Mi Band 5 билан батафсил танишиш мумкин:

Xiaomi мазкур гаджетини 18 июндан Хитойда сота бошлайди. Унинг NFC модулли версияси 32 доллар туради, мазкур чипга зарурати бўлмаганлар эса 27 долларлик талқинини танлашлари мумкин бўлади.

ЎҚИНГ: Xiaomi яна тўрт хил смартфон эгаларини глобал MIUI 12’ни ўрнатиб олишга чақиряпти!

Terabayt.uz сайтининг видеолари: Youtube'даги каналимизда!