Microsoft киберҳужумлар хавфи туфайли Windows XP ва бошқа эски тизимларини янгилади

  •   DiMaX
  •  801
  •  15.06.2017 14:57

Microsoft киберҳужумлар хавфи туфайли Windows XP ва бошқа эски тизимларини янгилади

Microsoft компанияси Windows XP операцион тизимини қўллаб-қувватлашни 2014 йилнинг апрелидаёқ тўхтатган эди. Аммо ўтган ойда у кутилмаганда WannaCry товламачи-вирусига қарши курашда ёрдам бериш мақсадида мазкур версия учун янгиланишни чиқарди. Энди эса компания эски операцион тизимларига содиқ қолган ўз мижозларини қўллаб-қувватлаш учун яхши йўл тутди – ҳар ҳафталик янгиланадиган тизимлар қаторига Windows XP’ни ҳам киритиб қўйди, деб ёзади The Verge.

«Жорий ой учун янгиланишларни таҳлил қилиш жараёнида ҳимояда айрим нозик жойлар борлиги аниқланди, – дейди Microsoft инқирозга қарши бошқарув бўйича бош менежери Эдриэн Холл. – Улар турли киберҳужумлар амалга оширилиши эҳтимолини оширади. Мазкур таваккалчиликнинг олдини олиш учун, мунтазам тарзда тақдим этиб келинаётган иккиламчи янгиланишлар билан бирга, биз қўшимча хавфсизлик янгиланишларини ҳам тақдим этамиз. Улардан барча мижозлар, жумладан, Windows’нинг эски версияларини ишлатаётганлар ҳам фойдалана оладилар».

Шу тариқа, WannaCry каби вируслар ҳужуми хавфи ортиб бораётганини ҳисобга олиб, Microsoft ўзининг ҳозирда қўллаб-қувватланаётган ва бундан маҳрум этилган – Windows XP, Vista ҳамда бошқа тизим версиялари учун ҳам яна янгиланишларни тақдим этди. Компаниянинг таъкидлашича, буни стандарт хизмат кўрсатиш сиёсатидан чекиниш, деб қабул қилмаслик керак. Бу – Windows тизими ҳимоясидаги «тирқиш»лар орқали янги ҳужумлар уюштирилишининг олдини олиш учун истисно тарзида амалга оширилган қадамдир.

Бироқ Microsoft’дагилар мазкур «тирқиш»лардан ўзларини ким огоҳлантирганлигини айтишмади. Эҳтимол, бу АҚШ Миллий хавфсизлик агентлиги ахборот тизимларини бузиб кирганлиги билан танилган Shadow Brokers гуруҳи хакерларидир.

Агарда сиз ҳам расман харид қилинган Windows XP ишлатаётган бўлсангиз, янгиланишларни тезда олиб ўрнатсангиз арзийди. Чунки, гарчи WannaCry вирусидан зарар кўрган компьютерларнинг асосий қисми Windows 7’да ишлаётган бўлса-да, кейинги ҳужумлар кенгроқ кўлам олишидан хавфсирасак арзийди.

Эслатиб ўтамиз, инсониятга рекорд суммада зарар келтирган WannaCry вируси компьютерни блоклаб қўйиб, блокни ечиш учун фойдаланувчидан тўлов талаб қилади. Маълумотларга кўра, жаҳон бўйлаб бир неча ўн минг компьютер зарарланган, улар орасида Ўзбекистон ҳудудидаги қурилмалар ҳам бор. Кейинчалик мазкур вирусдан хакерлар қанча ишлагани маълум бўлди, Microsoft компанияси эса унинг айбдорини ва ҳимояланиш чорасини айтди. «Касперский лабораторияси» бўлса, WannaCry вирусини Шимолий Корея яратган, дея гумон қиляпти. Жанубий Кореяни эса мазкур вирусдан Samsung ҳимоя қилмоқчи.

Хабарларни тез ва осон ўқиш учун Андроид иловамизни сақлаб олинг.