Montblanc ақлли блокнот тайёрламоқда
Премиум канцелярия маҳсулотлари ва аксессуарлар ишлаб чиқарадиган машҳур немис компанияси Montblanc ўзини гаджетлар бозорида синаб кўрмоқчи. Аввалроқ Montblanc Samsung Galaxy Note4 учун эксклюзив стилус ва ҳар қандай соатни смарт-соатга айлантирадиган боғични ишлаб чиққан эди. Компания айни вақтда Берлиндан ўтказилаётган кўргазмада ўзининг Augmented Paper номли смарт-блокнотини намойиш этди. Таъкидлаш керак, бу компаниянинг шахсий маҳсулоти эмас, балки Wacom Bamboo Spark блокнотининг қайта ишланган версиясидир.
Montblanc гаджетни яратишда электромагнит-резонанс базасидаги технологиядан фойдаланган. Фойдаланувчи электрон панел устига қўйилган блокнот қоғозида махсус ручка билан ёзганида, унинг қайдлари автоматик тарзда рақамли форматда сақланиб боради.
Montblanc ручкаси StarWalker қаторидаги модель асосида тайёрланган, блокнотнинг дизайни эса тоза Италия чарми қўлланиладиган Urban Spirit услубида яратилган. Montblanc гаджет учун Wacom компаниясига тегишли мобил иловани ҳам ўзига мослаб қайта дастурлаган.
Augmented Paper блокноти 12 тилда ёзиладиган қўлёзма ёзувларни (улар ичида рус тили ҳам бор) рақамли форматда сақлай олади. Блокнотга ўрнатилган батарея саккиз соатли иш ёки 100 бетли қайдларни ёзишга етади. Киритилган қайдлар автоматик равишда смартфонга узатилади.
Ақлли блокнотнинг нархи – 725 доллар.