Motorola Samsung’ни плагиатда айблади

Motorola Samsung’ни плагиатда айблади

Motorola USA Twitter’да Samsung’ни AOD (Always On Display) функциясининг плагиатида айблади.

Ушбу функция илк марта Samsung Galaxy S7 флагманида пайдо бўлган эди. Функция экранни фаоллаштирмасдан тез-тез керак бўладиган маълумотларни (вақт, сана, календар ва бошқалар) кўриш имкониятини тақдим этади.

Motorola бундай функцияни Moto X моделига 2013 йилда тадбиқ қилган эди. Ўшанда Motorola уни Active Display деб номлаган. Бироқ Motorola Samsung’га қарши патентлар жангига кириша олмайди.

Агар масалага теранроқ қаралса, бундай хусусиятга эга функция бир неча йиллар илгари Symbian операцион тизимида пайдо бўлган ва Nokia N86 моделига қўлланилган эди.

Тан олиш керак,  Samsung мазкур функцияни сезиларли даражада такомиллаштирган. Айни пайтда ҳатто Always On Display’га қўллаш мумкин бўлган мавзулар ҳам тақдим этилмоқда.