Nothing смартфони ноёб қобилятларга эга!

Nothing смартфони ноёб қобилятларга эга!

Nothing компанияси тез орада ўзинининг илк смартфони, phone (1)'ни тақдим қилади ва биз аллақачон унинг шаффоф панелга эга орқа дизайнини кўрдик. Гарчи қурилманинг "ичак-чавоқлари" кўриниб турмасада, у худди орқа қопқоғи ёпилмаган смартфонга ўхшайди ва бу унинг ягона ўзига хос хусусияти эмас. Телефон орқасида C шаклида камерани, G шаклида симсиз зарядлаш майдончасини LED чироқ ўраб туради. Шунингдек, пастки марказда ҳам ундов белгиси кўринишидаги, ўнг юқори бурчакда ҳам қийшиқ ўрнатилган чизиқ шаклидаги ана шундай чироқлар мавжуд ва маълум бўлишича, улар шунчаки ёниб турадиган чироқлар эмас.

МКBHD номи билан танилган YouTube Маркес Браунли Nothing Phone 1 смартфонига эксклюзив ҳуқуқни қўлга киритди ва биринчи марта телефоннинг олд томонини кўрсатди. Ваъда қилинганидек, смартфон олд томонининг пастки қисмида "жағи" йўқ ва экран бирозгина қалинроқ, бир хил ўлчамдаги рамка билан ўралган. Селфи камераси эса экраннинг чап юқори бурчакда жойлашган. Ҳа, бир қарашда у оддий Android смартфонларга ўхшайди.

Орқа томонига келадиган бўлсак, шаффоф кўриниш унинг ноёб тарафларидан бири, лекин ундан ҳам ажойиби унинг LED чироқларидир. Маълум бўлишича, бу чироқлар биргаликда Glyph (Глиф) интерфейси деб аталади ва улар 900 дан ортиқ LED'лардан яратилган.

Энг аввало барча смартфонлардаги LED чироқлар каби phone (1) орқа чироқлари ҳам қороғуда оддий чироқ сифатида ёки суратга олиш вақтида ёруғликни тўлдириш учун хизмат қила олади. Шунингдек, қачонки сизга билдиришнома келганида чироқлар сизга буни билдириш учун ёниб-ўчиш хусусиятига ҳам эга. Симсиз зарядланиш майдонини ўраб турган G шаклли чироқ эса телефонни симсиз зарядлашни бошлаганингизда ёки аксинча, бошқа қурилмага симсиз заряд улашишни бошлаганингизда ёниб туради.

Тўғри, бу оддий хусусиятлар, лекин буниси: смартфонни симли зарядлашни бошлаганингизда пастки марказдаги ундов (ёки "i" ҳарфининг тескари?) шаклидаги чироқ қувватлаш жараёнини кўрсатиб турувчи панел бўлиб хизмат қилади. Масалан, смартфон 50% қувватига етганда ёруғлик ундовнинг ярмигача бўлади ва бу жуда фойдали.

Бу ҳам ҳайрон қолдирмадими? Унда бунисичи: phone (1) ўзининг ички 10 хил рингтонларига эга ва улар LED чироқлар билан мослаштирилган бўлиб, қачонки сизга қўнғироқ бўлганида рингтон товушларига мос равишда чироқлар ҳам ёниб ўчади. Сиз бу рингтонларнинг ҳар бирини ҳар хил контакларингиз учун ўрнатишингиз ва бунда телефонингиз овози ўчиқ бўлганда ҳам LED чироқлар ёниб ўчишига қараб ким қўнғироқ қилаётганини кўришингиз мумкин. Мана буни смартфонлар оламида янгилик деса бўлади.

Бундай рингтонлар дастурий таъминот янгиланиши билан янада кўпайтирилиши мумкин. Таъкидлаш жоизки, сиз бутун Glyph интерфейсини унинг учун махсус созламалар бўлимидан бошқаришингиз мумкин.

Nothing Phone 1 келаётган июл ойининг 12 санасида тақдим қилиниши кутилмоқда.

ЎҚИНГ: Nothing'нинг илк смартфони қачон тақдим қилиниши расман маълум қилинди!

Хабарларни тез ва осон ўқиш учун Андроид иловамизни сақлаб олинг.