Nothing'нинг иккинчи смартфони Америкада тақдим қилинади
Nothing компаниясининг иккинчи смартфони, Phone 2, бу сафар расман АҚШда чиқарилади. Бу ҳақда компания бош раҳбари Карл Пей Inverse нашрига берган интервюсида тасдиқлади.
Лондонлик компаниянинг Phone 1 номли илк смартфони Американи бозорини кўрмади. Nothing ўзининг шаффоф орқа панелли телефонини Европа ва Осиё мамлакатлари учун тақдим қилди. Бироқ, 2023 йилда компания ўз эътиборини Қўшма Штатлар томон қаратади.
"Биз АҚШни бозорлар нуқтайи назаридан биринчи ўринга қўйишга қарор қилдик", - дейди Карл Пей Inverse нашрига.
Аввалроқ, Nothing америкаликлар учун ўзининг бета дастурини ишга туширган эди. Бунда компания 299 доллар эвазига 8/128 хотира конфигурациясидаги Phone 1 смартфонининг қора рангли версиясини беради. Бироқ буни Nothing смартфонининг АҚШда тўлиқ сотувга чиқарилиши деб бўлмайди. Маълум бўлишича, бу компания учун Америка бозорига киришда қўйиладиган илк қадам: бозорни ўрганиш ва фойдаланувчилар фикри билан танишиш ҳисобланади.
"АҚШ учун смартфон ишлаб чиқараётганда сиз алоқа операторлар билан сертификатлаш ишларида ва уларнинг баъзи хусусиятларини операцион тизимга мослаштириш устида ишлашингиз керак. Илгари бизда бунинг учун ресурслар йўқ эди, ҳозир эса бор", – дейди Карл Пей. Шу ерда айтиш керакки, бугунги кунда Nothing компаниясининг ишчи кучи 400 га яқин кишини ташкил қилади, бу 2021 йилдагидан икки баравар кўп.
Карл Пейнинг қўшимча қилишича компания наушниклар савдосининг тахминан учдан бир қисми АҚШга тўғри келади. Ўз смартфонини Қўшма Штатларда ишга туширмаслик эса компанияга потенциал фойданинг учдан бир қисмидан қуруқ қолаётганини англатади.
Бўлажак Phone 2 қандай бўлиши ҳақида гап кетганда эса Карл Пей оғзига мум тишлаб олган. Компания раҳбари янги авлод Nothing Phone смартфони ҳозирги Phone 1ъга қараганда анча юқори даражадаги смартфон (эҳтимол, флагман) ишлаб чиқаётганликлари ва унда дастурий таъминотга катта эътибор қаратилишидан бошқа ҳеч қандай маълумотларни ошкор қилмаган.
Nothing Phone 2 шу йилнинг охирида чиқарилиши кутилмоқда.
ЎҚИНГ: Apple таҳлилчиси Буклама iPad келаси йил бошида пайдо бўлишини айтди
