Nothing'нинг илк смартфони қачон тақдим қилиниши расман маълум қилинди!
Nothing (Ҳеч нарса), OnePlus смартфон брендининг асосчиларидан бири бўлган Карл Пей бошчилигидаги янги стартап ўзининг илк мобил қурилмасини 2022 йилнинг 12 июл куни Тошкент вақти билан 20:00 да тақдим қилишини расман маълум қилди. Оддийгина phone (1) деб номланадиган янги-бренд смартфон Лондонда бўлиб ўтадиган Nothing (event) – Return to Instinct тадбирида биринчи марта расман кўрсатилади ва, ҳа, албатта, тақдимотни компаниянинг расмий веб-сайтида жонли кўриш ҳам мумкин бўлади.
Ҳозиргача смартфоннинг кўриниши ёки техник хусусиятлари расман маълум қилинмаган, бироқ, таҳминларга кўра, Nothing Phone 1 ўрта даражали телефон бўлиб, у Qualcomm'нинг Snapdragon 7 Gen 1 чипсети билан Android 12 операцион тизимига асосланган Nothing OS қобиғида ишлайди ва симсиз зарядланишни қўллаб-қувватлайди. Қурилма шаффоф орқа панел, қайта ишланган алюминий рамка ва олд томонининг юқори марказида тешикли селфи камера билан экран пастида "жағсиз" (қалин қора рамка чегарасисиз) дизайнига эга бўлади. Миш-мишларга кўра смартфон €500 (6 миллион сўмга яқин) нархда бўлади ва 21 июлдан сотувга чиқарилади.
Nothing смартфони компаниянинг электрон маҳсулотлари экотизимини яратиш учун навбатдаги қадам бўлади. Ҳозирда компания сотувида фақат ўтган йили тақдим қилинган ear (1) симсиз қулоқчинлари мавжуд.
ЎҚИНГ: Xiaomi 12 Ultra юқори сифатли рендерларда намойиш этилди
