Огоҳ бўлинг: Google Play'дан 100М+ юкланган илова вирус тарқатмоқда!
2010 йилдан буён мавжуд бўлган CamScanner иловаси яқин фурсатлардан буён фойдаланувчилар қурилмасига вирус олиб келишни бошлади.
PDF яратувчи кенг оммалашган ушбу илова, юклаб олинган қурилмаларга ўзи билан зарарли дастур олиб келаётганидан хабар топган Google уни Play Store'дан ўчириб юборди.
Шанхайда жойлашган CC Intelligence компанияси яратган CamScanner илк маротаба 2010 йилда Play Store'га чиқарилгандан буён ҳозирга қадар 100 миллиондан кўпроқ маротаба юклаб олинганди.
Дастурни яратган компания оптик белги таниш (OCR) технологиясига ихтисослашган. OCR функциясига эга CamScanner иловасидан ташқари, CC Intelligence бизнес карталари матнларини ўқувчи CamCard ва CamCard for Salesforce иловаларини ҳам сотади.
Компанияга CamScanner'дан маблағ ички харидлар ва рекламалар орқали келарди. Бироқ, рус антивирус фирмаси Kaspersky'даги мутахассисларнинг аниқлашича, илованинг янги версиясидаги рекламалар кутубхонасида Android қурилмаларини зарарловчи дастур бўлган. Яна таъкидланишича, зарарли код фойдаланувчига ўта ҳалал берувчи рекламалар кўрсатиши ва уларни ўзлари ҳам бехабар бўлгани ҳолда пулли обуналарга аъзо қилиб қўйиши мумкин. Kaspersky иддао қилаётган бу вирусга хакерлар серверига уланиб, қўшимча код юклаб олиш ва CamScanner иловаси мавжуд Andorid девайсига мана шу кодни қўллаш буйруғи берилган.
Айни дамда, CamScanner Google Play Store'да мавжуд эмас, бироқ унинг iOS версияси Apple'нинг App Store'ида ҳали ҳам бор.
Илова яратувчилари ўзлари ҳам билмаган ҳолда зарарли контентга эга реклама кутубхонасидан фойдалангани бу вазиятга сабаб бўлган бўлиши мумкин. Бундай ҳоллар ҳозирда бошқа иловалар билан ҳам кўплаб учраб турибди.
Масалан, BeiTaPlugin номли реклама кутубхоналаридан бири яқин фурсатларгача 238 та иловага реклама таъминлаб келаётганди. Бироқ унда ҳам “Троя оти“ мавжудлиги аниқлангач, юқоридаги 238 та илова Google Play'дан олиб ташланди. Бу вирусдан 440 миллион фойдаланувчи зарар кўрган. Шунингдек, Google мана шу кутубхонадан фойдаланишини яширишга уринган хитойлик дастурчиларнинг 60 та иловасини ҳам олиб ташлади.
