Oppo Find X5 Pro'нинг техник жиҳатлари маълум бўлди
Яқин йиллардан буён OnePlus компанияси камералар сифатини яхшилаш мақсадида Hasselblad билан ҳамкорлик қилаётган эди. Бу йилдан OnePlus'нинг “яқин қариндоши“ бўлган Oppo ҳам машҳур камера ишлаб чиқарувчи компания билан ҳамкорликни йўлга қўйди.
ЎҚИНГ: Oppo Find X5 Pro жонли суратларда
Эсингизда бўлса, бир неча ҳафта олдин Х50 Pro'нинг жонли суратларини тақдим этган эдик. Фотосуратда смартфоннинг орқа панелида Hasselblad ёзуви борлиги кўринган эди.
Шунингдек, камера модулида “Powered by MariSilicon“ ёзуви ҳам бор эди. MariSilicon - бу Oppo компаниясига тегишли бўлган бренд бўлиб, у тасвирни қайта ишлаш чипларини ишлаб чиқаришга ихтисослашган.
Қурилмага 1/1.56 дюймли ҳамда 1.0 µm пиксел катталиги ва f/1.7 диафрагмадаги 50МП асосий камера, f/2.2 диафрагмадаги ультракенг камера ўрнатилади. MariSilicon чипи 10-битли ранг майдонида тасвирни қайта ишлаш билан шуғулланади, шунингдек, у кўп йўналишли автофокус тизимини тез ишлашини таъминлайди.
WinFuture маълумотларига кўра, смартфонга 5х гибрид зумга эга бўлган 13МП телефото камера ўрнатилади. Таққослаш учун, X3 Pro модели 2х оптик зумни қўллаб-қувватловчи телефото камера билан жиҳозланган эди. Аввалги маълумотларда Х5 Pro ҳам 2х оптик зумга эга бўлган камерага эга бўлиши айтилган эди.
Селфи камера янгиланади. Эски IMX615 сенсори ўрнига янги 32МП резолюция ҳамда f/2.2 диафрагмадаги IMX709 сенори ўрнатилади.
Find X5 Pro модели 80 ваттда қувват олувчи 5,000 мАс сиғимли аккумулятор билан жиҳозланади. Аввалги модель 4,500 мАс сиғимли аккумуляторга эга эканлигини ҳисобга олсак, буни ўсиш дейиш мумкин. Шунингдек, смартфонни симсиз ҳам қувватлаш имконияти яратилади.
Қурилмага 120Hz янгиланиш частотасида ишловчи 1440 пиксел резолйтусиядаги 6.7 дюймли LTPO AMOLED дисплейи ўрнатилиши кутилмоқда. Дисплей Gorilla Glass Victus шишаси билан ҳимояланади. Смартфон корпуси алюминийдан ишланган ҳамда унда сув ва чангдан ҳимояловчи IP68 стандарти мавжуд.
Қуриламанинг Ceramic Black ҳамда Ceramic White рангдаги турлари бўлса ҳам, уларнинг орқа пенели керамика билан эмас, балки шиша билан қопланади. Янги модель эскисига қараганда қалин ва оғирроқ. Қалинлик 8.5 миллиметр, оғирлик эса 218 граммни ташкил қилади.
Oppo Find X5 Pro смартфони 12ГБ тезкор ҳамда 256ГБ UFS 3.1 доимий хотираси билан интеграциялашган Snapdragon 8 Gen чипи билан жиҳозланади. Хотира ҳажмини microSD картаси билан кенгайтиришнинг имкони йўқ.
Find X5 сериясидан учта смартфон ўрин олади. Pro моделнинг нархи 1200 евродан ошиқ бўлиши айтилмоқда. Оддий Find X5 эса Dimensity 9000 чипига эга бўлиши кутилмоқда.
Oppo компанияси Find X5 триосини февраль ойи охирида тақдим этади.
