Oppo Find Х6 эканлиги таҳмин қилинаётган смартфон бегемот камерага эга!
Oppo ўзининг навбатдаги флагман смартфонини тайёрламоқда. Интернетда эса аллақачон унинг жонли суратлари тарқатилди ва агар унга ишонадиган бўлсак, смартфон сезиларли даражада бўртиб чиққан катта камера билан келади.
Oppo Find Х5 флагман смартфони ўтган йилнинг феврал ойида, барча эътибор унинг камерасига қаратилган ҳолда сотувга чиқарилган эди, чунки у компания ўзи ишлаб чиқарган MariSilicon Х – махсус тасвирлаш чипи билан жиҳозланган биринчи смартфон эди. Oppo Find Х6 билан эса компания ушбу чипни яхшироқ ва каттароқ камера ускуналари билан улашга тайёр кўринади – Интернетда Oppo Find Х6 эканлиги айтилаётган смартфоннинг жонли суратлари тарқалди.
Суратларга қараб шуни айтиш мумкинки, бу жуда қалин смартфон ва бунга унинг орқа камераси сабабчидир. Мақоладаги асосий суратга эътибор берган бўлсангиз смартфон стол устига қўйилган ҳолатда ҳам унинг тепа томони столдан сезиларли даражада кўтарилиб турибди. Яна бир суратдан эса ушбу катта камера ороли тўртбурчак шаклда эканлигини кўришимиз мумкин.
Миш-мишларга кўра, Oppo Find Х6 камераси катта эканлигини 23 мм эквивалент фокус узунлигидаги 1 дюймли Sony IMX989 (50 МП) сенсори билан изоҳлаш мумкин. Шу биргина катта камера сенсорининг ўзигина смартфон камера оролида қолган қўшимча камералар учун жой қолишини сўроқ остига олади.
Oppo Find Х6 аниқ қачон тақдим қилиниши ҳозирча маълум эмас, лекин унинг феврал ойида тақдим қилиниши эҳтимоли юқори.
ЎҚИНГ: Samsung яна бир янги 200МП камера сенсорини тақдим қилди
