Oppo ноодатий дизайндаги Oppo Air Glass ақлли кўзойнакларини тақдим этди
Oppo компанияси INNO Day тадбирларида ақлли кўзойнакларни тақдим этишни одат тусига айлантирди. Янги Oppo Air Glass икки қисмдан ташкил топган. Биринчиси бу - ўнг томонида махсус магнити бўлган кўзойнак, иккинчиси эса магнитга ўрнатиладиган қурилма.
ЎҚИНГ: Xiaomi смартфонларнинг аккумулятори учун янги технологияни тақдим этди
Ушбу қурилма микропроекторга эга бўлиб, турли хил маълумотларни ойнада кўрсатиб туриш вазифасини бажаради.
Гаджет Snapdragon Wear 4100 Platform чипсети билан жиҳозланган. Шунингдек, кўзойнакдаги монокуляр тўлқин узатгич ва Spark микропроектори микро LED технологиясидан фойдаланган ҳолда маълумотларни кўзойнак ойналарига чиқариб беради.
Проектор атиги 0.5 кубосантиметр ҳажмда бўлиб, бу энг ихчам проекторлардан бири ҳисобланади. Проекторнинг кичик ўлчамига қарамай, Micro-LED технологияси юқори ёрқинлик даражасини таклиф этади. Ўртача даражада ёрқинлик 1400 нитга етиши мумкин.
Қурилмани қўл ҳаракати, овоз ҳамда бошни қимирлатиш орқали бошқариш мумкин. Мисол учун, билдиришномаларни очиш ёки ёпиш учун бошни тепадан пастга ёки чапдан ўнгга қимирлатиш керак бўлади.
Кўзойнакда об-ҳаво, тақвим, саломатлик, навигация каби турли хил иловалар мавжуд. Бундан ташқари, қурилма сўз ва гапларни инглизчадан хитойчага ёки хитойчадан инглизчага таржима қилиши мумкин. Тез орада улар қаторига корейс ва япон тиллари ҳам қўшилади.
Oppo Air Glass Хитойда 2022 йилнинг 1 чорагида сотувга чиқарилади. Унинг оқ ёки қора рангли ҳамда икки хил рамкали тури бўлади.
Air Glass'га уланиш учун Oppo Watch 2 ёки Oppo смартфонларидаги Smart Glass иловаси керак бўлади.
ЎҚИНГ: Яна бир компания ўзининг биринчи букламафонини тақдим этади
