OPPO рекордчи селфифон – Reno 3 Pro ҳамёнбоп флагманини намойиш қилди
Яқинда ўзининг Realme брендига мансуб 5G-флагмани – Realme X50 Pro 5G смартфонини сотувга чиқарган Oppo бугун яна бир тақдимотини ўтказди. Ҳиндистонда бўлиб ўтган матбуот анжуманида у Reno 3 Pro смартфонини намойиш этди.
ЎҚИНГ: Realme X50 Pro 5G сотувда: Xiaomi Mi 10 рақиби ундан арзон ва атиги 35 дақиқада қувватга тўлади!
Янги флагманида OPPO селфи сифатига асосий эътиборни қаратган. Бунинг учун у Reno 3 Pro дисплейидаги тирқишда қўшалоқ қамера жойлаган. Олд камеранинг асосий сенсори эса нақ 44 мегапикселлик бўлиб, селфи-камералар орасида бу рекорд ҳисобланади. Унга расмга олинаётган саҳна чуқурлигини ўлчовчи ҳамда орқа фонни хиралаштирувчи 2 мегапикселлик оддий датчик ҳамроҳлик қилади.
Reno 3 Pro бошқа жиҳатлари билан анъанавий ҳамёнбоп флагманлардан биридек кўринади. Унинг дисплейи диагоналига 6,4 дюймлик ва Full HD+ форматида. AMOLED-матрицали ушбу экран кадр янгиланишининг 90 герцлик частотасини қўллаб-қувватлайди. Дактилоскопик датчик ҳам дисплейнинг ўзига интеграция қилинган.
ЎҚИНГ: Йилнинг энг зўр селфифони сотувга чиқди: чегирма ва муддатли тўлов
OPPO Reno 3 Pro бош камераси эса тўртта сенсорни ўз ичига олади:
- Асосий – 64 МП, f/1,7
- Телефото – 13 МП, f/2,4, 2 карра зум
- Кенг бурчакли – 8 МП, f/2,2
- Бадиий расмлар учун оқ-қора датчик – 2 МП
Шу билан бирга, Reno 3 Pro модели тайванлик чипсоз – MediaTek компанияси яқинда намойиш қилган Helio P95 процессори базасидаги илк смартфон ҳам бўлди. Флагманнинг ишлаш самарадорлигини таъминлаш учун унга 8 гигабайтлик тезкор хотира елкадош бўлади. Бу смартфон доимий хотираси 128 ва 256 гигабайтлик вариантларда таклиф этилади.
Reno 3 Pro корпусида иккита SIM-карта учун алоҳида, microSD-карта учун алоҳида уяча мавжуд; яна 3,5 миллиметрлик қулоқчин тирқиши ҳам бор. OPPO унинг аккумуляторига ҳам аҳамият қаратган – 4025 мА/соатлик батарея 30 ваттлик VOOC 4.0 тезкор қувватлаш технологиясига эга. Шунинг эвазига смартфонни бир соатга ҳам қолмасдан тўлиқ зарядлаш мумкин.
Компания бу маҳсулотини фақат Ҳиндистон бозори учун тақдим этган ва 30 минг рупийдан бошланувчи нархларда сотмоқчи. Бу эса тахминан 412 долларга тўғри келади.
