Oppo Reno8 серияси тақдим этилди
Бир неча ҳафтадан бери миш-мишлардан тушмай келаётган Oppo Reno8 серияси ниҳоят тақдим этилди. Reno8 модели 80 ватт қувватлаш технологияси ва Dimensity 1300 чипи билан жиҳозланади. Pro модель Snapdragon 7 Gen1 чипи билан дебют қилган бўлса, Pro+ модель Dimensity 8100 Max чипига эга бўлди.
Ҳар учала смартфонга AMOLED дисплей, 50МП асосий камера ва 80 ватт SuperVOOC қувватига эга 4,500 мАс аккумулятор ўрнатилган. Pro версияларга қўшимча камера созланмалари ва Oppo Find X5 Pro флагманида бўлган MariSilicon X NPU чипи қўшилган.
Reno8 Pro+
Сериядаги энг кучли модель 120 гертсда ишловчи 6.7 дюймли AMOLED дисплейи билан жиҳозланган. Унинг юқори қисмидан 32МП селфи камера ўрин олган бўлиб, у автофокус функциясига эга. Шунингдек, смартфоннинг пастки ва юқоридаги рамкалари 2.37 миллиметр, ён томонлари эса 1.4 миллиметрга ингичкалашган. Компания ушбу моделни энг ингичка рамкаларга эга бўлган Reno смартфони демоқда.
Reno8 Pro+ модель 12ГБ гача LPDDR5 оператив хотира ва 256ГБ UFS 3.1 хотираси билан бирлаштирилган Dimensity 8100 Max чипига эга. Орқа томонда FInd X5 Pro билан бир хил бўлган 50МП Sony IMX766 сенсори жойлашган бўлиб, смартфондаги MariSilicon X NPU чипи билан бирга у сунъий интеллект шовқинини камайтириш ва 4K Ultra тунги видеога олиш имкониятларини тақдим этади. Орқа панелдан, шунингдек, 8МП ультракенг ва 2МП макро камералар ўрин олган.
Смартфон Android 12 операцион тизимига асосланган ColorOS 12.1 график қобиғида ишлайди. Қурилмага 80 ваттда қувват олувчи 4,500 мАс сиғимли аккумулятор ўрнатилган.
Reno8 Pro+ кулранг, қора ва яшил рангларда тақдим этилди. Унинг нархи қуйидагича:
8/256ГБ - 556 доллар
12/256ГБ - 600 доллар
Смартфон 1 июнь санасидан сотувга чиқади.
Reno8 Pro
Oppo Reno8 Pro - бу Qualcomm компаниясининг янги Snapdragon 7 Gen1 чипсетига эга биринчи смартфонлардан бири бўлди. Янги 7 серияли чип 4 нанометрли жараёнда асосида яратилган бўлиб, Kyro CPU кластери ва Adreno 662 график процессорига эга. Oppo ушбу моделни Mari X Silicon Х NPU чипи ва худди Reno8 Pro+ моделидаги каби 50 мегапикселли Sony IMX766 сенсори, 8 мегапикселли ультра кенг қамровли камера ҳамда 2 мегапикселли макро камералар билан жиҳозлади.
Ушбу модель 120 гертсда ишловчи 6.62 дюймли AMOLED дисплейи билан жиҳозланган. Дисплейдаги 32МП селфи камера эса Pro+ модель каби автофокус функциясига эга эмас. Қурилмага 80 ваттда қувват олувчи 4,500 мАс сиғимли аккумулятор ўрнатилган.
Reno8 Pro кўк, қора ва градиент рангларда тақдим этилди. Унинг нархи қуйидагича:
8/128ГБ - 450 доллар
8/256ГБ - 480 доллар
12/256ГБ - 525 доллар
Қурилма 11 июнь санасидан сотувга чиқади.
Reno8
Сериядаги энг арзон смартфон 90 гертс частотада ишловчи 6.43 дюймли AMOLED дисплейи билан жиҳозланган. Орқа панелдан 50МП асосий, 2МП монохром ва 2МП макро камералар ўрин олган. Қурилма Dimensity 1300 чипи ҳамда 80 ваттда қувват олувчи 4,500 мАс сиғимли аккумуляторга эга.
Reno8 моделининг нархи қуйидагича:
8/128ГБ - 375 доллар
12/256ГБ - 440 доллар
Ушбу модель 1 июнь санасидан сотувга чиқади.
ЎҚИНГ: Redmi Note 11T Pro ва Note 11T Pro+ смартфонлари тақдим этилди
