Ортга назар: Galaxy A80 - айланувчи камерали ноёб смартфон

Ортга назар: Galaxy A80 - айланувчи камерали ноёб смартфон

Хабарингиз бор, ўтган ҳафтада Samsung компанияси 2022 йил учун ўзининг янги Galaxy A33, A53 ва A73 смартфонларини тақдим этди. А серияда бюджет ва ўрта тоифага мансуб смартфон бўлади. Ушбу сериянинг илк смартфони Galaxy Alpha ҳисобланади. 

2019 йили ушбу серияда ноодатий дизайндаги Galaxy A80 смартфони тақдим этилди. Бу ҳозирча айланувчи камерага эга бўлган ягона Galaxy ҳисобланади. Келинг, яхши смартфон билан яқиндан танишамиз. 

Бир неча йил олдин корпусдан сизиб чиқувчи камералар оммалашган эди. Айланувчи камера эса унга муқобил бўлиши керак эди. Бироқ иккала ечимга бўлган талаб йўқолиб бориб, юмалоқ тирқишли селфи камера оммалашиб кетди. 

Ҳозир эса айрим компаниялар селфи камерани экран остига жойлаштиришни бошлашди. 

Galaxy A80 модели рекламаларда “Infinity Display“ (чексиз дисплей) дея тасвирланди. Юмалоқ тирқишли селфи камерали смартфонлар учун Samsung “Infinity-O“, томчисимон селфи камералр учун эса “Infinity-U“ сўзидан фойдаланди. Galaxy А80 ҳақиқий “Infinity“дизайндаги смартфон, чунки панелида селфи камера учун ҳеч қандай жой ёки тирқиш йўқ. 

Смартфон 6.7 дюймли Super AMOLED дисплейи билан жиҳозланган. Орқа панелдаги камера модули эса махсус механизм орқали олд томонга айланиб ўтиши мумкин эди. 

Айланувчи камераларнинг сизиб чиқувчи камералардан фарқи шунда эдики, ундан ҳам асосий, ҳам селфи камера сифатида фойдаланиш мумкин. Бу эса юқори сифатли селфи суратларни тақдим этади. 

Galaxy A80 моделига 1/2.0 дюймли сенсорга эга бўлган 48МП асосий камера ўрнтилган. Шунингдек, асосий камерага қўшимча 8МП ультракенг ва 3D ToF камералари ҳам айланувчи механизмдан ўрин олган. Бу эса ўз навбатида ажойиб селфи ультракенг суратларни ҳам тақдим этади. 

Қурилма экраности оптик бармоқ изи сканерига эга бўлган биринчи Galaxy смартфонларидан бўлган. Ўша вақтдаги Galaxy S10 серияси эса ультра товушли бармоқ изи сканери билан жиҳозланган. 

A80 моделида A70 каби экран қулфини юз билан очиш функцияси бўлмаган. Чунки камера модулини айлантириб берувчи механизм секин ишланганлиги сабаб ушбу функциядан воз кечилган. 

Смартфон Snapdragon 730 чипида ишлайди. Ўша вақт учун Snapdragon 730 ўрта тоифанинг кучли чипсетларидан бўлган. Гарфика учун эса Adreno 618 график процессори жавоб берган. 

Смартфон флагман даражада эмас, бироқ одатий ўрта тоифа смартфонларидан яхшироқ эди. Юқори даражадаги дисплей ва айланувчи камера каби хусусиятлар смартфоннинг нархини ошиб кетишига сабаб бўлган. Қурилма 730 доллар нархда сотувга чиққан. Унинг нархи ҳатто баъзи флагманларнинг нархидан-да қимматроқ бўлган. 

Гаджет 25 ватт тезкор қувватлаш технологиясини қўллаб-қувватлаган. Ўша вақтда 25 ваттда қувват олувчи Galaxy смартфонлари жуда кам эди. Бироқ аккумулятор ҳажми бироз кичикроқ - 3,700 мАс бўлган. Таққослаш учун, ҳажм жиҳатидан A80 билан тенг бўлган A70 модели 4,500 мАс сиғимли аккумулятор билан жиҳозланган. 

Galaxy A80'нинг фақатгина 8/128ГБ хотирага эга бўлган тури сотувга чиқарилган. Энг қизиғи, хотирани microSD картаси билан кенгайтиришнинг имкони бўлмаган, шунингдек, 3.5 мм аудио жек ҳам смартфондан олиб ташланган. Унинг “укаси“ A70 моделида эса ҳам 3.5 мм аудио жек, ҳам microSD уяси бўлган. 

Samsung қанча Galaxy A80 сотишга муваффақ бўлганини маълум эмас. Аммо шу маълумки, смартфон лойиҳаси ўзини оқламаган. Шунинг учун, кейинги йилда Samsung A80 лойиҳасини давом эттиришдан воз кечган. Бироқ ушбу модель ўзининг ноёб дизайни билан Galaxy смартфонлари тарихидан ўрин олган. 

ЎҚИНГ: Тезкор қувватлаш технологияси смартфонда кичикроқ ҳажмдаги аккумулятор бўлишига сабаб бўъладими? 

Сайт янгиликларидан доимий хабардор бўлиш учун Телеграм каналимизга қўшилинг!