Photoshop ҳам керак эмас: Remove.bg – орқа фонни бир неча сонияда тозаловчи бепул сервис!
Product Hunt асосчиси Райан Гувер ўзининг Twitter-аккаунтида Remove.bg сервисига эътибор қаратган. Мазкур сайт айрим ўринларда Adobe Photoshop ўрнини боса олади.
ЎҚИНГ: PSD-файлларни Photoshop’сиз ҳам очадиган 5 дастур
Remove.bg онлайн сервисининг асосий вазифаси – фотосуратларда орқа фонни олиб ташлашдир. Қулайлиги шундаки, бунда сиз расмда бирор ҳудудни белгилаб ўтиришингиз шарт эмас – сервиснинг ўзи барчасини автоматик тарзда бажаради.
Remove.bg сайтида орқа фонни белгилаб, олиб ташлаш учун «сунъий онг» технологияларидан фойдаланилади. Қўшимча алгоритмлар эса майда деталларнинг аниқлигини яхшилаб беради.
Сервисдан фойдаланиш учун унинг сайтига мана бу ҳавола орқали ўтиб, керакли расмни юклаш ёки интернетдаги суратнинг URL-манзилини киритиш кифоя. Бир неча сониядан сўнг таҳрирланган тасвирни *.png форматида қабул оласиз.
Тўғри, Remove.bg тизими ҳозирча фақат портретларнигина таҳрирлай олади – унинг «сунъий идрок»и одамнинг силуэтини автоматик аниқлашга қодир. Лекин келажакда бу технологияни ривожлантиришни ваъда қилишяпти.